yun lag raha hai jaise guman TuTne ko hai

yuuñ lag rahā hai jaise gumāñ TūTne ko hai

ya.anī haqīqatoñ kā jahāñ TūTne ko hai

ḳhvāb-o-ḳhayāl-o-fikr kī ra.anā.iyāñ liye

kāġhaz pe merā harf-e-bayāñ TūTne ko hai

jab is ke baad dā.imī ik ghar hai muntazir

kyā ġham jo aarzī sā makāñ TūTne ko hai

jo faisla huā hai adālat meñ haq taraf

hairān aql hai ye zabāñ TūTne ko hai

paḌh kar jadīd shā.irī ye fā.eda huā

uslūb apnā apnā bayāñ TūTne ko hai

dekho kināre apne sambhāle raho miyāñ

jaarī jo hai ye sail-e-ravāñ TūTne ko hai

ab kaun hogā apne nishāne kī zad pe yaañ

ab tiir kyā kareñge kamāñ TūTne ko hai

ab us ko aise chhoḌnā achchhā nahīñ miyāñ

kuchh ho ḳhayāl pīr-e-muġhāñ TūTne ko hai

bardāsht kī bhī koī to had hotī hai 'obaid'

ab is se aage band-e-fuġhāñ TūTne ko hai

yun lag raha hai jaise guman TuTne ko hai

yani haqiqaton ka jahan TuTne ko hai

KHwab-o-KHayal-o-fikr ki ranaiyan liye

kaghaz pe mera harf-e-bayan TuTne ko hai

jab is ke baad daimi ek ghar hai muntazir

kya gham jo aarzi sa makan TuTne ko hai

jo faisla hua hai adalat mein haq taraf

hairan aql hai ye zaban TuTne ko hai

paDh kar jadid shairi ye faeda hua

uslub apna apna bayan TuTne ko hai

dekho kinare apne sambhaale raho miyan

jari jo hai ye sail-e-rawan TuTne ko hai

ab kaun hoga apne nishane ki zad pe yan

ab tir kya karenge kaman TuTne ko hai

ab us ko aise chhoDna achchha nahin miyan

kuchh ho KHayal pir-e-mughan TuTne ko hai

bardasht ki bhi koi to had hoti hai 'obaid'

ab is se aage band-e-fughan TuTne ko hai