yun nafraton mein mohabbat ke silsile dekhe

yuuñ nafratoñ meñ mohabbat ke silsile dekhe

jo toḌne pe na TuuTe vo aa.ine dekhe

paḌegā farq bhī kyā un ke duur jaane se

qarīb rah ke bhī ham ne to fāsle dekhe

huā jo ham pe ayaañ ḳhud nishān manzil kā

to raqs karte hue rah meñ zalzale dekhe

ḳhumār un kā abhī tak hai merī āñkhoñ meñ

jo maiñ ne ḳhvāb kī sūrat meñ rat-jage dekhe

zamīn par hī nahīñ silsila judā.ī kā

sitāre ham ne falak ke bhī TūTte dekhe

rahe vo ashk bahāte jo mere apne the

lahad meñ saath jo utre vo dūsre dekhe

zamīñ pe aag lagā dī palak jhapakne meñ

falak se TūTte bijlī ke zāviye dekhe

hamesha azmat-e-insāñ ke ham rahe qaa.il

na ohde dekhe kabhī aur na martabe dekhe

nishāt-o-ġham ke ka.ī zindagī meñ moḌ aa.e

to talḳh-o-shīrīñ sabhī ham ne zā.iqe dekhe

uḌā rahā thā vo jaise mazāq ḳhud apnā

ḳhushī kī bazm meñ muflis ke qahqahe dekhe

sabab haiñ apnī tabāhī kā atomī hathiyār

havā meñ aadmī ke uḌte parḳhache dekhe

ho shā.erī se jise ishq us pe lāzim hai

mirī ġhazal ko paḌhe aur qāfiye dekhe

hamesha hañstā huā dushmanoñ se pesh aaya

buland-tar the jo 'sā.ir' ke hausle dekhe

yun nafraton mein mohabbat ke silsile dekhe

jo toDne pe na TuTe wo aaine dekhe

paDega farq bhi kya un ke dur jaane se

qarib rah ke bhi hum ne to fasle dekhe

hua jo hum pe ayan KHud nishan manzil ka

to raqs karte hue rah mein zalzale dekhe

KHumar un ka abhi tak hai meri aankhon mein

jo main ne KHwab ki surat mein rat-jage dekhe

zamin par hi nahin silsila judai ka

sitare hum ne falak ke bhi TuTte dekhe

rahe wo ashk bahate jo mere apne the

lahad mein sath jo utre wo dusre dekhe

zamin pe aag laga di palak jhapakne mein

falak se TuTte bijli ke zawiye dekhe

hamesha azmat-e-insan ke hum rahe qail

na ohde dekhe kabhi aur na martabe dekhe

nishat-o-gham ke kai zindagi mein moD aae

to talKH-o-shirin sabhi hum ne zaiqe dekhe

uDa raha tha wo jaise mazaq KHud apna

KHushi ki bazm mein muflis ke qahqahe dekhe

sabab hain apni tabahi ka atomi hathiyar

hawa mein aadmi ke uDte parKHache dekhe

ho shaeri se jise ishq us pe lazim hai

meri ghazal ko paDhe aur qafiye dekhe

hamesha hansta hua dushmanon se pesh aaya

buland-tar the jo 'sair' ke hausle dekhe