yun nazar-andaz kar ke zulm Dhaya hai bahut

yuuñ nazar-andāz kar ke zulm Dhāyā hai bahut

be-ruḳhī ne terī mujh ko āzmāyā hai bahut

tum bhī samjhauta karo apnī mohabbat ke liye

maiñ ne bhī is ke liye ḳhud ko jhukāyā hai bahut

do dinoñ kī thī mohabbat chaar din kī zindagī

chaar ke chāroñ hī din us ne rulāyā hai bahut

baiTh kar tum ne parā.ī mahfiloñ meñ jān-e-jāñ

bārhā yuuñ ḳhuun ko mere jalāyā hai bahut

maiñ ne to sochā thā tujh ko bhuul jā.ūñgā magar

tū to pahle se bhī lekin yaad aaya hai bahut

ik nazar dīdār ho jaa.e tirā bas is liye

bārhā aa tere dar ko khaTkhaTāyā hai bahut

ab ki 'nāqir' rūThā hai vo chhoḌ jaane ke liye

jaan kar bhī sab use maiñ ne manāyā hai bahut

yun nazar-andaz kar ke zulm Dhaya hai bahut

be-ruKHi ne teri mujh ko aazmaya hai bahut

tum bhi samjhauta karo apni mohabbat ke liye

main ne bhi is ke liye KHud ko jhukaya hai bahut

do dinon ki thi mohabbat chaar din ki zindagi

chaar ke chaaron hi din us ne rulaya hai bahut

baiTh kar tum ne parai mahfilon mein jaan-e-jaan

barha yun KHun ko mere jalaya hai bahut

main ne to socha tha tujh ko bhul jaunga magar

tu to pahle se bhi lekin yaad aaya hai bahut

ek nazar didar ho jae tera bas is liye

barha aa tere dar ko khaTkhaTaya hai bahut

ab ki 'naqir' ruTha hai wo chhoD jaane ke liye

jaan kar bhi sab use main ne manaya hai bahut