yun nigah Dali hai us kafir ke sine ki taraf

yuuñ nigah Daalī hai us kāfir ke siine kī taraf

juuñ sharābī dekhtā hai ābgīne kī taraf

jis tarah schōl ke bachchoñ kī bantī hai qatār

yuuñ maiñ le aatā huuñ lafzoñ ko qarīne kī taraf

maiñ hī gumnāmī ke mahbas meñ akelā rah gayā

dost saare chal paḌe shohrat ke ziine kī taraf

maiñ to us din ḳhud-kushī ke vāste tayyār thā

mujh ko us kā pyaar le aaya hai jiine kī taraf

is qadar 'gulzār' sāhib se 'aqīdat hai use

paañv phailātā nahīñ vo shaḳhs diine kī taraf

ham ne jin ko nā-ḳhudā.ī sauñp dī is mulk kī

vo bhañvar ḳhud le kar aa.e haiñ safīne kī taraf

aañkh meñ bhīgī rutoñ kā 'aks hai 'yāvar-azīm'

dil khiñchā jaatā hai sāvan ke mahīne kī taraf

yun nigah Dali hai us kafir ke sine ki taraf

jun sharabi dekhta hai aabgine ki taraf

jis tarah school ke bachchon ki banti hai qatar

yun main le aata hun lafzon ko qarine ki taraf

main hi gumnami ke mahbas mein akela rah gaya

dost sare chal paDe shohrat ke zine ki taraf

main to us din KHud-kushi ke waste tayyar tha

mujh ko us ka pyar le aaya hai jine ki taraf

is qadar 'gulzar' sahib se 'aqidat hai use

panw phailata nahin wo shaKHs dine ki taraf

hum ne jin ko na-KHudai saunp di is mulk ki

wo bhanwar KHud le kar aae hain safine ki taraf

aankh mein bhigi ruton ka 'aks hai 'yawar-azim'

dil khincha jata hai sawan ke mahine ki taraf