yun nikalti hai dil se aah kahin

yuuñ nikaltī hai dil se aah kahīñ

ho na ho laḌ ga.ī nigāh kahīñ

baḌhtī hī jaatī haiñ tamannā.eñ

dil ko kar deñ na ye tabāh kahīñ

dekh lī maiñ ne bhī jhalak un kī

chūktī hai mirī nigāh kahīñ

le ke dil tū ne to churā.ī aañkh

is tarah hotī hai nibāh kahīñ

ham se āḳhir vo muñh chhupāne lage

chhuptī hai shauq kī nigāh kahīñ

aql ne is meñ TeḌh paidā kī

nazar aa.ī jo sīdhī raah kahīñ

zabt-e-girya kā ehtimām to hai

na nikal jaa.e muñh se aah kahīñ

tere dar par jise amaañ na milī

us ko miltī nahīñ panāh kahīñ

dil ko āñkhoñ ne kar diyā gumrāh

ab ye hotā hai rū barāh kahīñ

ġhair kā ishq dil-lagī Thahrā

ham se hotā jo ye gunāh kahīñ

kah na de un se hāl-e-dil 'āsif'

merī hasrat-bharī nigāh kahīñ

yun nikalti hai dil se aah kahin

ho na ho laD gai nigah kahin

baDhti hi jati hain tamannaen

dil ko kar den na ye tabah kahin

dekh li main ne bhi jhalak un ki

chukti hai meri nigah kahin

le ke dil tu ne to churai aankh

is tarah hoti hai nibah kahin

hum se aaKHir wo munh chhupane lage

chhupti hai shauq ki nigah kahin

aql ne is mein TeDh paida ki

nazar aai jo sidhi rah kahin

zabt-e-girya ka ehtimam to hai

na nikal jae munh se aah kahin

tere dar par jise aman na mili

us ko milti nahin panah kahin

dil ko aankhon ne kar diya gumrah

ab ye hota hai ru barah kahin

ghair ka ishq dil-lagi Thahra

hum se hota jo ye gunah kahin

kah na de un se haal-e-dil 'asif'

meri hasrat-bhari nigah kahin