yun paband-e-salasil ho kar kaun phire bazaron mein

yuuñ pāband-e-salāsil ho kar kaun phire bāzāroñ meñ

ḳhud hī qaid na ho jaa.eñ kyuuñ apnī hī dīvāroñ meñ

raat ke lamhoñ kī sañgīnī dil ko Dastī rahtī hai

jism sulagtā rahtā hai tanhā.ī ke añgāroñ meñ

raushniyoñ ke shahr añdheroñ ke jaadū meñ Duub ga.e

bujhne lagī ho nuur kī mash.al jaise chāñd-sitāroñ meñ

dard ke tapte sahrā meñ ik ābla-pā sar-gardāñ hai

tum ko kyā tum jashn manāo ḳhushiyoñ ke gahvāroñ meñ

maiñ koī suqrāt na thā jo zahr kā pyāla pī jaatā

maiñ ḳhud kaise Duub sakūñgā apne lahū kī dhāroñ meñ

shahr kī rāheñ raqs-kunāñ haiñ rañg fazā meñ bikhrā hai

kitne chehre saje hue haiñ in chamkīlī caroñ meñ

yun paband-e-salasil ho kar kaun phire bazaron mein

KHud hi qaid na ho jaen kyun apni hi diwaron mein

raat ke lamhon ki sangini dil ko Dasti rahti hai

jism sulagta rahta hai tanhai ke angaron mein

raushniyon ke shahr andheron ke jadu mein Dub gae

bujhne lagi ho nur ki mashal jaise chand-sitaron mein

dard ke tapte sahra mein ek aabla-pa sar-gardan hai

tum ko kya tum jashn manao KHushiyon ke gahwaron mein

main koi suqraat na tha jo zahr ka pyala pi jata

main KHud kaise Dub sakunga apne lahu ki dhaaron mein

shahr ki rahen raqs-kunan hain rang faza mein bikhra hai

kitne chehre saje hue hain in chamkili caron mein