yun pau phaTi ki subh ki tauqir ghaT gai

yuuñ pau phaTī ki sub.h kī tauqīr ghaT ga.ī

sūraj chaḌhā to dhuup añdheroñ meñ baT ga.ī

har shaam yuuñ lagā ki qayāmat kā din Dhalā

har sub.h yuuñ lagā ki sadī ek kaT ga.ī

saa.e meñ aayā maiñ to 'ajab vāqi'a huā

saa.e kā saath chhoḌ ke dīvār haT ga.ī

maiñ dab gayā to piis ke surma banā diyā

uTThā to apne ḳhol meñ duniyā simaT ga.ī

shahr-e-navā pe paḌ ga.ī uftād kyā 'ajab

sannāTe bolne lage āvāz phaT ga.ī

itnā machāyā shor butoñ ne darūn-e-sañg

patthar kī mīThī niiñd bhī āḳhir uchaT ga.ī

hālāñki dekhnā hai mirā aur baat aur

vo aañkh sab ke saath mujhe bhī DapaT ga.ī

āḳhir ko rang lā.īñ mirī ḳhāksāriyāñ

us kī galī kī gard bhī mujh se lipaT ga.ī

gardan pe jis kī kitnī patañgoñ kā ḳhuun thā

muddat huī patang hamārī vo kaT ga.ī

phirtā hai āftāb liye kāsa-e-gadā.ī

thī jitnī dhuup chāñd sitāroñ meñ baT ga.ī

mahfūz jis meñ thī tirī duzdīda ik nazar

bāzār-e-zindagī meñ vahī jeb kaT ga.ī

is bhuk-marī meñ is ko ġhanīmat hī jāniye

yāroñ kī jūtiyoñ meñ agar daal baT ga.ī

tafsīl meñ na jā ki payambar to maiñ na thā

'muztar' mirī qamīs thī ik roz phaT ga.ī

yun pau phaTi ki subh ki tauqir ghaT gai

suraj chaDha to dhup andheron mein baT gai

har sham yun laga ki qayamat ka din Dhala

har subh yun laga ki sadi ek kaT gai

sae mein aaya main to 'ajab waqi'a hua

sae ka sath chhoD ke diwar haT gai

main dab gaya to pis ke surma bana diya

uTTha to apne KHol mein duniya simaT gai

shahr-e-nawa pe paD gai uftad kya 'ajab

sannaTe bolne lage aawaz phaT gai

itna machaya shor buton ne darun-e-sang

patthar ki miThi nind bhi aaKHir uchaT gai

haalanki dekhna hai mera aur baat aur

wo aankh sab ke sath mujhe bhi DapaT gai

aaKHir ko rang lain meri KHaksariyan

us ki gali ki gard bhi mujh se lipaT gai

gardan pe jis ki kitni patangon ka KHun tha

muddat hui patang hamari wo kaT gai

phirta hai aaftab liye kasa-e-gadai

thi jitni dhup chand sitaron mein baT gai

mahfuz jis mein thi teri duzdida ek nazar

bazar-e-zindagi mein wahi jeb kaT gai

is bhuk-mari mein is ko ghanimat hi jaaniye

yaron ki jutiyon mein agar dal baT gai

tafsil mein na ja ki payambar to main na tha

'muztar' meri qamis thi ek roz phaT gai