yun qaid hum hue ki hawa ko taras gae

yuuñ qaid ham hue ki havā ko taras ga.e

apne hī kaan apnī sadā ko taras ga.e

the kyā ajiib log ki jiine ke shauq meñ

āb-e-hayāt pī ke havā ko taras ga.e

kuchh roz ke liye jo kiyā ham ne tark shahr

bashindagān-e-shahr jafā ko taras ga.e

murda adab ko dī hai na.ī zindagī magar

bīmār ḳhud paḌe to davā ko taras ga.e

ḳhālī jo apnā jism lahū se huā 'qamar'

kitne hī haath rañg-e-hinā ko taras ga.e

yun qaid hum hue ki hawa ko taras gae

apne hi kan apni sada ko taras gae

the kya ajib log ki jine ke shauq mein

aab-e-hayat pi ke hawa ko taras gae

kuchh roz ke liye jo kiya hum ne tark shahr

bashindagan-e-shahr jafa ko taras gae

murda adab ko di hai nai zindagi magar

bimar KHud paDe to dawa ko taras gae

KHali jo apna jism lahu se hua 'qamar'

kitne hi hath rang-e-hina ko taras gae