yun ruTh kar na ja ki tujhe kuchh KHabar bhi hai

yuuñ ruuTh kar na jā ki tujhe kuchh ḳhabar bhī hai

'umr-e-junūñ darāz bhī hai muḳhtasar bhī hai

vo aañkh dekh kar bhī mujhe ajnabī sī hai

iqrār-e-‘ishq bhī hai zamāne kā Dar bhī hai

ai zindagī kabhī to mujhe muḌ ke dekh le

ik shaḳhs terā chāhne vaalā idhar bhī hai

is shahr-e-qātilāñ se hameñ kyā nahīñ milā

siine meñ dāġh-e-‘ishq bhī hai zaḳhm-e-sar bhī hai

māyūs ho ke kuchh na milegā jahān meñ

jiinā bhī sīkhiye ki ye jiinā hunar bhī hai

sūraj hisār-e-shab se nikal to gayā magar

ḳhūn-e-shafaq se jāma-e-ḳhush-rang tar bhī hai

itnā tujhe ḳhayāl rahe ai amīr-e-shahr

ūñchī haveliyoñ kā muqaddar khañDar bhī hai

patthar uThā ke soch rahā huuñ maiñ ai 'bashīr'

is shahr-e-sang meñ mirā shīshe kā ghar bhī hai

yun ruTh kar na ja ki tujhe kuchh KHabar bhi hai

'umr-e-junun daraaz bhi hai muKHtasar bhi hai

wo aankh dekh kar bhi mujhe ajnabi si hai

iqrar-e-‘ishq bhi hai zamane ka Dar bhi hai

ai zindagi kabhi to mujhe muD ke dekh le

ek shaKHs tera chahne wala idhar bhi hai

is shahr-e-qatilan se hamein kya nahin mila

sine mein dagh-e-‘ishq bhi hai zaKHm-e-sar bhi hai

mayus ho ke kuchh na milega jahan mein

jina bhi sikhiye ki ye jina hunar bhi hai

suraj hisar-e-shab se nikal to gaya magar

KHun-e-shafaq se jama-e-KHush-rang tar bhi hai

itna tujhe KHayal rahe ai amir-e-shahr

unchi haweliyon ka muqaddar khanDar bhi hai

patthar uTha ke soch raha hun main ai 'bashir'

is shahr-e-sang mein mera shishe ka ghar bhi hai