yun samaya hai ki ab sar se nikalne ka nahin

yuuñ samāyā hai ki ab sar se nikalne kā nahīñ

maiñ jo chāhūñ bhī to ik Dar se nikalne kā nahīñ

maiñ ne jo ḳhauf piroyā thā ragoñ meñ apnī

aisā baiThā hai ki andar se nikalne kā nahīñ

baa'd koshish ke natīja ye nikālā maiñ ne

zindagī maiñ tire chakkar se nikalne kā nahīñ

khīñch laate haiñ haqīqat meñ havādis varna

aadmī ḳhvāb ke mehvar se nikalne kā nahīñ

sar paTaḳhtā nahīñ piñjre meñ parinda yūñhī

shauq-e-parvāz kabhī par se nikalne kā nahīñ

ik saḌak aur mirā āTHvāñ dasvāñ chakkar

aur mujhe 'ilm hai vo ghar se nikalne kā nahīñ

apne andar yuuñ chhupā.e haiñ sanam patthar ne

but koī tesha-e-āzar se nikalne kā nahīñ

ġham-e-daurāñ bhī hai yuuñ jaise mirā yaum-e-hisāb

maiñ to duniyā meñ bhī mahshar se nikalne kā nahīñ

dhauñs detā hai ye sūraj mujhe har shaam 'hasan'

vo jo Duubā to samundar se nikalne kā nahīñ

yun samaya hai ki ab sar se nikalne ka nahin

main jo chahun bhi to ek Dar se nikalne ka nahin

main ne jo KHauf piroya tha ragon mein apni

aisa baiTha hai ki andar se nikalne ka nahin

ba'd koshish ke natija ye nikala main ne

zindagi main tere chakkar se nikalne ka nahin

khinch late hain haqiqat mein hawadis warna

aadmi KHwab ke mehwar se nikalne ka nahin

sar paTaKHta nahin pinjre mein parinda yunhi

shauq-e-parwaz kabhi par se nikalne ka nahin

ek saDak aur mera aaTHwan daswan chakkar

aur mujhe 'ilm hai wo ghar se nikalne ka nahin

apne andar yun chhupae hain sanam patthar ne

but koi tesha-e-azar se nikalne ka nahin

gham-e-dauran bhi hai yun jaise mera yaum-e-hisab

main to duniya mein bhi mahshar se nikalne ka nahin

dhauns deta hai ye suraj mujhe har sham 'hasan'

wo jo Duba to samundar se nikalne ka nahin