yun tabiat to paDhai mein laga rakkhi thi

yuuñ tabī'at to paḌhā.ī meñ lagā rakkhī thī

is kī tasvīr kitāboñ meñ sajā rakkhī thī

ḳhud-kushī karne se pahle kisī doshīza ne

phuul se hāthoñ meñ ḳhushbū-e-hinā rakkhī thī

vo dupaTTe jo kabhī sar se Dhalakte hī na the

raat un meñ bhī bahut tez havā rakkhī thī

beTī sasurāl meñ do din bhī ḳhushī se na rahī

shart daulat ne ġharībī se lagā rakkhī thī

phuul se hañste hue bachchoñ kī ḳhātir maañ ne

apne āñchal meñ kaḌī dhuup chhupā rakkhī thī

'aam laḌkoñ kī tarah ham ne bhī tā'līm ke baa'd

naukrī milne kī ummīd lagā rakkhī thī

mere hoñToñ ko kabhī izn-e-takallum na milā

varna maiñ ne bhī tire haq meñ du'ā rakkhī thī

yun tabi'at to paDhai mein laga rakkhi thi

is ki taswir kitabon mein saja rakkhi thi

KHud-kushi karne se pahle kisi doshiza ne

phul se hathon mein KHushbu-e-hina rakkhi thi

wo dupaTTe jo kabhi sar se Dhalakte hi na the

raat un mein bhi bahut tez hawa rakkhi thi

beTi sasural mein do din bhi KHushi se na rahi

shart daulat ne gharibi se laga rakkhi thi

phul se hanste hue bachchon ki KHatir man ne

apne aanchal mein kaDi dhup chhupa rakkhi thi

'am laDkon ki tarah hum ne bhi ta'lim ke ba'd

naukri milne ki ummid laga rakkhi thi

mere honTon ko kabhi izn-e-takallum na mila

warna main ne bhi tere haq mein du'a rakkhi thi