yun tasawwur mein tera husn nazar aata hai

yuuñ tasavvur meñ tirā husn nazar aatā hai

jaise darpan meñ koī aks jhalak jaatā hai

ek muddat se hai go tark-e-ta.alluq phir bhī

dil ko ik jazba-e-be-nām sā taḌaptā hai

gahre ho jaate haiñ jis vaqt añdhere ġham ke

terī bikhrī huī zulfoñ kā ḳhayāl aatā hai

kitne dilchasp haiñ āzār-e-mohabbat ai dost

phuul khilte haiñ to dil aur bhī ghabrātā hai

rah ga.e bujh ke mohabbat bharī yādoñ ke charāġh

raushnī dil meñ koī phir bhī kiye jaatā hai

ek ḳhāmosh udāsī kā hai aalam taarī

kaun ḳhvāboñ meñ dabe paañv chalā aatā hai

'raaj aatā hai kabhī pyaar meñ aisā bhī maqām

ek dil rotā hai aur saarā jahāñ gaatā hai

yun tasawwur mein tera husn nazar aata hai

jaise darpan mein koi aks jhalak jata hai

ek muddat se hai go tark-e-talluq phir bhi

dil ko ek jazba-e-be-nam sa taDapta hai

gahre ho jate hain jis waqt andhere gham ke

teri bikhri hui zulfon ka KHayal aata hai

kitne dilchasp hain aazar-e-mohabbat ai dost

phul khilte hain to dil aur bhi ghabraata hai

rah gae bujh ke mohabbat bhari yaadon ke charagh

raushni dil mein koi phir bhi kiye jata hai

ek KHamosh udasi ka hai aalam tari

kaun KHwabon mein dabe panw chala aata hai

'raj aata hai kabhi pyar mein aisa bhi maqam

ek dil rota hai aur sara jahan gata hai