yun to aksar dekhte hain aana jaana maut ka

yuuñ to aksar dekhte haiñ aanā jaanā maut kā

rang lekin aaj dekhā hai nayā sā maut kā

zindagī ne to kabhī jiine kī mohlat dī nahīñ

ab hai bas ham be-sahāroñ ko sahārā maut kā

pahle kar lete haiñ mil kar jo bhī jis se ban paḌe

baiTh kar phir dekhte haiñ sab tamāshā maut kā

dikh rahe haiñ saa.e hī saa.e se kyoñ chāroñ taraf

vaqt shāyad aan pahuñchā hai hamārā maut kā

saarī jangeñ jiit kar ham mil ga.e haiñ aaj par

ḳhauf mujh par chhā rahā hai be-tahāshā maut kā

zindagī to 'ārzī hai zindagī se kyā gila

khel hai jo hai yahāñ saarā kā saarā maut kā

dil kī hālat kuchh bigaḌtī jā rahī hai din-ba-din

ban na jaa.e ek din ye dil bahānā maut kā

zindagī ke kitne hī marqūm afsāne kiye

likh nahīñ paa.ī 'sahar' lekin fasāna maut kā

yun to aksar dekhte hain aana jaana maut ka

rang lekin aaj dekha hai naya sa maut ka

zindagi ne to kabhi jine ki mohlat di nahin

ab hai bas hum be-sahaaron ko sahaara maut ka

pahle kar lete hain mil kar jo bhi jis se ban paDe

baiTh kar phir dekhte hain sab tamasha maut ka

dikh rahe hain sae hi sae se kyon chaaron taraf

waqt shayad aan pahuncha hai hamara maut ka

sari jangen jit kar hum mil gae hain aaj par

KHauf mujh par chha raha hai be-tahasha maut ka

zindagi to 'arzi hai zindagi se kya gila

khel hai jo hai yahan sara ka sara maut ka

dil ki haalat kuchh bigaDti ja rahi hai din-ba-din

ban na jae ek din ye dil bahana maut ka

zindagi ke kitne hi marqum afsane kiye

likh nahin pai 'sahar' lekin fasana maut ka