yun to aksar dil bhi dhaDke chehre par

yuuñ to aksar dil bhī dhaḌke chehre par

jo kuchh haiñ āñkheñ haiñ mere chehre par

paḌhne vaalī aañkh vazīfa kartī hai

likh detā hai pyaar sahīfe chehre par

mere chehre par likkhā hai naam mirā

aur tirī tasvīr hai tere chehre par

shaam se pahle raat utarne lagtī hai

hañs dete haiñ jab ā.īne chehre par

pahle merī āñkhoñ ko zanjīr kiyā

phir khole sātoñ darvāze chehre par

tere ġham ne har aalam pahchān liyā

maiñ ne kyā kyā chehre oḌhe chehre par

saal guzar jaate haiñ ishq meñ aur 'munīr'

tham kar rah jaate haiñ lamhe chehre par

yun to aksar dil bhi dhaDke chehre par

jo kuchh hain aankhen hain mere chehre par

paDhne wali aankh wazifa karti hai

likh deta hai pyar sahife chehre par

mere chehre par likkha hai nam mera

aur teri taswir hai tere chehre par

sham se pahle raat utarne lagti hai

hans dete hain jab aaine chehre par

pahle meri aankhon ko zanjir kiya

phir khole saton darwaze chehre par

tere gham ne har aalam pahchan liya

main ne kya kya chehre oDhe chehre par

sal guzar jate hain ishq mein aur 'munir'

tham kar rah jate hain lamhe chehre par