yun to bahut makan hain magar ghar nahin rahe

yuuñ to bahut makāñ haiñ magar ghar nahīñ rahe

ya.anī hamāre gaañv meñ chhappar nahīñ rahe

kuchh shahr vaale gaañv mire aa.e na kabhī

aa.e bhī mushkiloñ se to shab-bhar nahīñ rahe

furqat meñ ab kisī kī bhī rote nahīñ haiñ log

āñkhoñ meñ ab kisī ke samandar nahīñ rahe

unglī pakaḌ ke chal rahīñ tanhā.iyāñ mirī

rāheñ abhī bhī saath haiñ rahbar nahīñ rahe

yuuñ to hamāre ghar meñ har ik chiiz hai magar

vo maañ ke haath ke bane bistar nahīñ rahe

muddat se jangaloñ meñ na dekhā gayā vo qais

vo is liye ki ab vahāñ tītar nahīñ rahe

saare rivāj-o-rasm taraqqī meñ kho ga.e

bichhte the jo zamīñ pe vo langar nahīñ rahe

shīshe kī tarh saaf the kuchh dushmanoñ ke dil

in āstīnoñ meñ kabhī ḳhanjar nahīñ rahe

duniyā ke ranj ne yuuñ inheñ mom kar diyā

patthar-mizāj shaḳhs bhī patthar nahīñ rahe

un kī anā-o-faḳhr kā ab kyā kareñ gila

ham bhī to apne aap meñ aksar nahīñ rahe

un meñ bhī ab vo aalī samā.at kahāñ rahī

aur ham bhī pahle jaise suḳhanvar nahīñ rahe

yun to bahut makan hain magar ghar nahin rahe

yani hamare ganw mein chhappar nahin rahe

kuchh shahr wale ganw mere aae na kabhi

aae bhi mushkilon se to shab-bhar nahin rahe

furqat mein ab kisi ki bhi rote nahin hain log

aankhon mein ab kisi ke samandar nahin rahe

ungli pakaD ke chal rahin tanhaiyan meri

rahen abhi bhi sath hain rahbar nahin rahe

yun to hamare ghar mein har ek chiz hai magar

wo man ke hath ke bane bistar nahin rahe

muddat se jangalon mein na dekha gaya wo qais

wo is liye ki ab wahan titar nahin rahe

sare riwaj-o-rasm taraqqi mein kho gae

bichhte the jo zamin pe wo langar nahin rahe

shishe ki tarh saf the kuchh dushmanon ke dil

in aastinon mein kabhi KHanjar nahin rahe

duniya ke ranj ne yun inhen mom kar diya

patthar-mizaj shaKHs bhi patthar nahin rahe

un ki ana-o-faKHr ka ab kya karen gila

hum bhi to apne aap mein aksar nahin rahe

un mein bhi ab wo aali samaat kahan rahi

aur hum bhi pahle jaise suKHanwar nahin rahe