yun to har ek shaKHs hi talib samar ka hai

yuuñ to har ek shaḳhs hī tālib samar kā hai

aisā bhī koī hai ki jise ġham shajar kā hai

ye kaisā kārvāñ hai ki ek ek gaam par

sab sochte haiñ kyā koī mauqa' safar kā hai

ye kaisā āsmāñ hai ki jis kī fazāoñ meñ

ek ḳhauf sā shikastagī-e-bāl-o-par kā hai

ye kaisā ghar hai jis ke makīnoñ ko har ghaḌī

dhaḌkā sā ek larzish-e-dīvār-o-dar kā hai

āñkhoñ pe tīrgī kā tasallut hai is qadar

kirnoñ pe ehtimāl fareb-e-nazar kā hai

chehre kā koī daaġh dikhā.ī na de mujhe

ye mo'jiza 'ajab mire ā.īna-gar kā hai

thā 'mīr-jī' kā daur ġhanīmat ki un dinoñ

dastār hī kā Dar thā magar ab to sar kā hai

ye saare silsile the jab āñkhoñ meñ nuur thā

ab kis kā intizār kisī dīda-var kā hai

ġhālib hai ab buland sadā hī dalīl par

'sādiq' hamārā daur 'ajīb shor-o-shar kā hai

yun to har ek shaKHs hi talib samar ka hai

aisa bhi koi hai ki jise gham shajar ka hai

ye kaisa karwan hai ki ek ek gam par

sab sochte hain kya koi mauqa' safar ka hai

ye kaisa aasman hai ki jis ki fazaon mein

ek KHauf sa shikastagi-e-baal-o-par ka hai

ye kaisa ghar hai jis ke makinon ko har ghaDi

dhaDka sa ek larzish-e-diwar-o-dar ka hai

aankhon pe tirgi ka tasallut hai is qadar

kirnon pe ehtimal fareb-e-nazar ka hai

chehre ka koi dagh dikhai na de mujhe

ye mo'jiza 'ajab mere aaina-gar ka hai

tha 'mir-ji' ka daur ghanimat ki un dinon

dastar hi ka Dar tha magar ab to sar ka hai

ye sare silsile the jab aankhon mein nur tha

ab kis ka intizar kisi dida-war ka hai

ghaalib hai ab buland sada hi dalil par

'sadiq' hamara daur 'ajib shor-o-shar ka hai