yun to har jang mein hum had se guzar jate hain

yuuñ to har jang meñ ham had se guzar jaate haiñ

lekin is 'ishq ke maidān meñ Dar jaate haiñ

ham to muddat se salāmat haiñ isī ātish meñ

log nazdīk bhī aate haiñ to mar jaate haiñ

aap jitnī bhī hifāzat se unheñ rakh liije

dil ke ā.īne bahut jald bikhar jaate haiñ

baat chāhe vo raqīboñ se kareñ lekin ham

un kā dīdār hī karne ko Thahar jaate haiñ

jis ko thoḌī bhī adākārī nahīñ aatī hai

saare ilzām usī shaḳhs ke sar jaate haiñ

hashr ke din to ye āñkhoñ ko lahū kar deñge

zaḳhm ye aise nahīñ haiñ ki jo bhar jaate haiñ

ye bahut hai ki ta'alluq ye ka.ī saal rahā

varna kitne to bas ik pal meñ mukar jaate haiñ

yaad sahrā kī satātī hai bahut gulshan meñ

yā'nī dīvāne ye ab lauT ke ghar jaate haiñ

yun to har jang mein hum had se guzar jate hain

lekin is 'ishq ke maidan mein Dar jate hain

hum to muddat se salamat hain isi aatish mein

log nazdik bhi aate hain to mar jate hain

aap jitni bhi hifazat se unhen rakh lije

dil ke aaine bahut jald bikhar jate hain

baat chahe wo raqibon se karen lekin hum

un ka didar hi karne ko Thahar jate hain

jis ko thoDi bhi adakari nahin aati hai

sare ilzam usi shaKHs ke sar jate hain

hashr ke din to ye aankhon ko lahu kar denge

zaKHm ye aise nahin hain ki jo bhar jate hain

ye bahut hai ki ta'alluq ye kai sal raha

warna kitne to bas ek pal mein mukar jate hain

yaad sahra ki satati hai bahut gulshan mein

ya'ni diwane ye ab lauT ke ghar jate hain