yun to hone ko aur kya na hua

yuuñ to hone ko aur kyā na huā

koī banda magar ḳhudā na huā

kisī kā ham se gar bhalā na huā

to yahī kam hai kyā burā na huā

sar jhukā.eñ kisī ke aage kyoñ

sajda-e-banda jab ravā na huā

jo nikal jaa.eñ āstīñ ke saañp

haath meñ apne vo asā na huā

sho.ala-e-barq sard jis ne kiye

nazr-e-ātish vo āshiyāna huā

tā-dam-e-marg tā.ir-e-hastī

dām-e-andoh se rihā na huā

yuuñ to taa.at meñ zindagī guzrī

dil magar apnā pārsā na huā

hāsil-e-bandagī jo ho 'maqsūd'

sajda aisā koī adā na huā

yun to hone ko aur kya na hua

koi banda magar KHuda na hua

kisi ka hum se gar bhala na hua

to yahi kam hai kya bura na hua

sar jhukaen kisi ke aage kyon

sajda-e-banda jab rawa na hua

jo nikal jaen aastin ke sanp

hath mein apne wo asa na hua

shoala-e-barq sard jis ne kiye

nazr-e-atish wo aashiyana hua

ta-dam-e-marg tair-e-hasti

dam-e-andoh se riha na hua

yun to taat mein zindagi guzri

dil magar apna parsa na hua

hasil-e-bandagi jo ho 'maqsud'

sajda aisa koi ada na hua