yun to is jalwa-gah-e-husn mein kya kya dekha

yuuñ to is jalva-gah-e-husn meñ kyā kyā dekhā

jab tujhe dekh chuke koī na tujh sā dekhā

jab tirī dhun meñ kahīñ lāla-e-sahrā dekhā

ham ye samjhe ki tirā naqsh-e-kaf-e-pā dekhā

taare TuuTe to fazā meñ tirī aahaT gūñjī

chāñd niklā to tirā chehra-e-zebā dekhā

shahr-e-aġhyār sahī itnī ḳhushī kyā kam hai

ham ne dekhā tujhe aur anjuman-ārā dekhā

ham ko Thukrā ke kuchh aise tire tevar badle

jab sar-e-bazm bhī dekhā tujhe tanhā dekhā

ham to samjhe the qayāmat hai firāq-e-mahbūb

tujh se mil kar bhī magar hashr hī barpā dekhā

sub.h jab dhuup ke chashme se nahā kar niklī

ham ne ā.īna badal terā sarāpā dekhā

bijliyāñ ab to tire abr-e-karam kī barseñ

umr-bhar apne sulagte kā tamāshā dekhā

ham jo bhaTke bhī to kis shān-e-vafā se bhaTke

ham ne har laġhzish-e-pā meñ tirā iimā dekhā

ham ba-īñ tīra-nasībī na bane tīra-nazar

ham ne har raat kī chitvan meñ sitārā dekhā

terī qudrat kī siyāsat na samajh meñ aa.ī

haram-o-dair ko har daur meñ yakjā dekhā

aañkh kholī to jahāñ kān-e-javāhar thā 'nadīm'

haath phailā.e to har chiiz ko anqā dekhā

yun to is jalwa-gah-e-husn mein kya kya dekha

jab tujhe dekh chuke koi na tujh sa dekha

jab teri dhun mein kahin lala-e-sahra dekha

hum ye samjhe ki tera naqsh-e-kaf-e-pa dekha

tare TuTe to faza mein teri aahaT gunji

chand nikla to tera chehra-e-zeba dekha

shahr-e-aghyar sahi itni KHushi kya kam hai

hum ne dekha tujhe aur anjuman-ara dekha

hum ko Thukra ke kuchh aise tere tewar badle

jab sar-e-bazm bhi dekha tujhe tanha dekha

hum to samjhe the qayamat hai firaq-e-mahbub

tujh se mil kar bhi magar hashr hi barpa dekha

subh jab dhup ke chashme se naha kar nikli

hum ne aaina badal tera sarapa dekha

bijliyan ab to tere abr-e-karam ki barsen

umr-bhar apne sulagte ka tamasha dekha

hum jo bhaTke bhi to kis shan-e-wafa se bhaTke

hum ne har laghzish-e-pa mein tera ima dekha

hum ba-in tira-nasibi na bane tira-nazar

hum ne har raat ki chitwan mein sitara dekha

teri qudrat ki siyasat na samajh mein aai

haram-o-dair ko har daur mein yakja dekha

aankh kholi to jahan kan-e-jawahar tha 'nadim'

hath phailae to har chiz ko anqa dekha