yun to pahne hue pairahan-e-Khaar aata hun

yuuñ to pahne hue pairāhan-e-ḳhār aatā huuñ

ye bhī dekho ki ba-saudā-e-bahār aatā huuñ

arsh se jab nahīñ uThtī mirī fariyād kī guuñj

maiñ tujhe dil ke ḳharābe meñ pukār aatā huuñ

mujhe aatā hī nahīñ bas meñ kisī ke aanā

aa.uuñ bhī to ba-kaf-e-ābla-dār aatā huuñ

tū yahāñ zer-e-ufuq chand ghaḌī sustā le

maiñ zarā din se nimaT kar shab-e-tār! aatā huuñ

tujh se chhuT kar bhī tirī surḳhī-e-āriz kī qasam

chupke chupke tire dil meñ ka.ī baar aatā huuñ

ye alag baat ki phūloñ pe ho zaḳhmoñ kā gumāñ

maiñ to jab aatā huuñ ham-rañg-e-bahār aatā huuñ

dasht-e-har-fikr se maiñ asr-e-ravāñ kā insāñ

ho ke ḳhud apnī zehānat kā shikār aatā huuñ

inhī do bātoñ meñ kaT jaatī hai sab umr 'nadīm'

ai ġham-e-dahr na chheḌ ai ġham-e-yār aatā huuñ

yun to pahne hue pairahan-e-KHar aata hun

ye bhi dekho ki ba-sauda-e-bahaar aata hun

arsh se jab nahin uThti meri fariyaad ki gunj

main tujhe dil ke KHarabe mein pukar aata hun

mujhe aata hi nahin bas mein kisi ke aana

aaun bhi to ba-kaf-e-abla-dar aata hun

tu yahan zer-e-ufuq chand ghaDi susta le

main zara din se nimaT kar shab-e-tar! aata hun

tujh se chhuT kar bhi teri surKHi-e-ariz ki qasam

chupke chupke tere dil mein kai bar aata hun

ye alag baat ki phulon pe ho zaKHmon ka guman

main to jab aata hun ham-rang-e-bahaar aata hun

dasht-e-har-fikr se main asr-e-rawan ka insan

ho ke KHud apni zehanat ka shikar aata hun

inhi do baaton mein kaT jati hai sab umr 'nadim'

ai gham-e-dahr na chheD ai gham-e-yar aata hun