yun to sab ke liye kya kya na ishaare nikle

yuuñ to sab ke liye kyā kyā na ishāre nikle

mire hisse meñ to ab ke bhī ḳhasāre nikle

mujh meñ ik roz koī qatl huā thā aur phir

mirī āñkhoñ se bahut ḳhuun ke dhāre nikle

apne jaisī koī tasvīr banānī thī mujhe

mire andar se sabhī rang tumhāre nikle

maiñ ne samjhā thā ki nam-ḳhurda hai merī miTTī

chhū ke dekhā to tah-e-ḳhāk sharāre nikle

ahl-e-duniyā se koī jang thī dar-pesh hameñ

ham bhī kyā log the ḳhvāboñ ke sahāre nikle

lauT kar aa ga.e sahrā kī taraf āḳhir-kār

sab tire shahr meñ tanhā.ī ke maare nikle

maiñ ne mahsūs kiyā hī thā tujhe aaj kī shaam

raat jab aa.ī to palkoñ pe sitāre nikle

yun to sab ke liye kya kya na ishaare nikle

mere hisse mein to ab ke bhi KHasare nikle

mujh mein ek roz koi qatl hua tha aur phir

meri aankhon se bahut KHun ke dhaare nikle

apne jaisi koi taswir banani thi mujhe

mere andar se sabhi rang tumhaare nikle

main ne samjha tha ki nam-KHurda hai meri miTTi

chhu ke dekha to tah-e-KHak sharare nikle

ahl-e-duniya se koi jang thi dar-pesh hamein

hum bhi kya log the KHwabon ke sahaare nikle

lauT kar aa gae sahra ki taraf aaKHir-kar

sab tere shahr mein tanhai ke mare nikle

main ne mahsus kiya hi tha tujhe aaj ki sham

raat jab aai to palkon pe sitare nikle