yun to yusuf se hasin aur jawan the pahle

yuuñ to yūsuf se hasīñ aur javāñ the pahle

aap se log zamāne meñ kahāñ the pahle

roz-e-avval se haiñ ham soḳhta-dil kushta-e-ġham

aaj jaise haiñ yūñhī sho.ala-ba-jāñ the pahle

ishq ne khol diye ham pe vo asrār-e-hayāt

jo zamāne kī nigāhoñ se nihāñ the pahle

āḳhir aanā hī paḌā lauT ke terī jānib

qāfile dil ke ba-har-samt-e-ravāñ the pahle

un bahāroñ ko ajab rañg meñ paayā ham ne

jin se vābasta hasīñ vahm-o-gumāñ the pahle

vo siyah-baḳht yahāñ mahv-e-fuġhāñ aaj bhī haiñ

jo siyah-baḳht yahāñ mahv-e-fuġhāñ the pahle

marhale ishq ke āsān samajh baiThe the

'manshā' ham log bhī kyā sāda-gumāñ the pahle

yun to yusuf se hasin aur jawan the pahle

aap se log zamane mein kahan the pahle

roz-e-awwal se hain hum soKHta-dil kushta-e-gham

aaj jaise hain yunhi shoala-ba-jaan the pahle

ishq ne khol diye hum pe wo asrar-e-hayat

jo zamane ki nigahon se nihan the pahle

aaKHir aana hi paDa lauT ke teri jaanib

qafile dil ke ba-har-samt-e-rawan the pahle

un bahaaron ko ajab rang mein paya hum ne

jin se wabasta hasin wahm-o-guman the pahle

wo siyah-baKHt yahan mahw-e-fughan aaj bhi hain

jo siyah-baKHt yahan mahw-e-fughan the pahle

marhale ishq ke aasan samajh baiThe the

'mansha' hum log bhi kya sada-guman the pahle