yun zabt-e-musalsal ka sila kyun nahin dete

yuuñ zabt-e-musalsal kā sila kyuuñ nahīñ dete

har naqsh-e-tamannā hī miTā kyuuñ nahīñ dete

manzil pe bhī āsūda-e-manzil na huā dil

phir ham ko bhaTakne kī duā kyuuñ nahīñ dete

rah rah ke sulagte haiñ ḳhayāloñ meñ na.e ġham

yādoñ ke saman-zār jalā kyuuñ nahīñ dete

us se to hikāyāt-e-junūñ aur baḌheñgī

chup kyuuñ ho koī baat banā kyuuñ nahīñ dete

dil hai to kahīñ nazr karo kaam to aa.e

sar hai to kisī dar pe jhukā kyuuñ nahīñ dete

ā.īn-e-karam bhuul ga.e ahl-e-nazar bhī

māhaul ko aa.ina dikhā kyuuñ nahīñ dete

miltā hai pata jin ko tire naam se apnā

vo log hameñ terā pata kyuuñ nahīñ dete

kaise maiñ pukāroñ ki bahut duur huuñ tum se

tum dil ke qarīñ ho to sadā kyuuñ nahīñ dete

yun zabt-e-musalsal ka sila kyun nahin dete

har naqsh-e-tamanna hi miTa kyun nahin dete

manzil pe bhi aasuda-e-manzil na hua dil

phir hum ko bhaTakne ki dua kyun nahin dete

rah rah ke sulagte hain KHayalon mein nae gham

yaadon ke saman-zar jala kyun nahin dete

us se to hikayat-e-junun aur baDhengi

chup kyun ho koi baat bana kyun nahin dete

dil hai to kahin nazr karo kaam to aae

sar hai to kisi dar pe jhuka kyun nahin dete

aain-e-karam bhul gae ahl-e-nazar bhi

mahaul ko aaina dikha kyun nahin dete

milta hai pata jin ko tere nam se apna

wo log hamein tera pata kyun nahin dete

kaise main pukaron ki bahut dur hun tum se

tum dil ke qarin ho to sada kyun nahin dete