yunhi be-nam talluq mein na mare jate

yūñhī be-nām ta'alluq meñ na maare jaate

achchhā hotā jo tire husn pe vaare jaate

bārhā ham ne use ro ke kahā hai sāhab

din judā.ī ke nahīñ ham se guzāre jaate

ham ko ma.alūm na thā aaj magar sochā hai

terī zulfoñ kī tarah baḳht sañvāre jaate

is liye ham ne javānī ko yahāñ bech diyā

be-navāoñ se kahāñ qarz utāre jaate

aaj shiddat se ye ehsās huā hai jānāñ

ham kabhī apne havāle se pukāre jaate

Dūbnā apne muqaddar meñ likhā thā 'tanhā'

kyoñ na phir duur safīne se kināre jaate

yunhi be-nam ta'alluq mein na mare jate

achchha hota jo tere husn pe ware jate

barha hum ne use ro ke kaha hai sahab

din judai ke nahin hum se guzare jate

hum ko malum na tha aaj magar socha hai

teri zulfon ki tarah baKHt sanware jate

is liye hum ne jawani ko yahan bech diya

be-nawaon se kahan qarz utare jate

aaj shiddat se ye ehsas hua hai jaanan

hum kabhi apne hawale se pukare jate

Dubna apne muqaddar mein likha tha 'tanha'

kyon na phir dur safine se kinare jate