yunhi gar lutf tum lete rahoge KHun bahane mein

yūñhī gar lutf tum lete rahoge ḳhuuñ bahāne meñ

to bismil hī nazar ā.eñge har sū is zamāne meñ

zarā dam lo to phir tum ko sunā.īñ dāstāñ dil kī

abhī kuchh rañg bharnā hai hameñ ġham ke fasāne meñ

lahū se ho ga.ī rañgīn dekho āstīñ apnī

hazāroñ koshisheñ kiiñ tum ne go dāman bachāne meñ

yahī kah kar asīrān-e-qafas aañsū bahāte haiñ

qafas meñ vo kahāñ rāhat milī jo āshiyāne meñ

kuchh aisā be-ḳhudī-e-shauq ne behis banāyā hai

aziyyat ab nahīñ mahsūs hotī tiir khāne meñ

vo barham hoñge duniyā jaan legī raaz ulfat kā

vafā par harf aa jā.egā do aañsū bahāne meñ

davā kā vaqt ab baaqī nahīñ hañgām-e-ruḳhsat hai

sidhāreñ chāra-gar ab der kyā hai niiñd aane meñ

balā se bijliyāñ girtī haiñ duniyā par gireñ lekin

maza miltā hai un ko dam-ba-dam yuuñ muskurāne meñ

munāsib hai yahī 'rif.at' ki baaz aao mohabbat se

hai lāzim jaan kā ḳhatra kisī se dil lagāne meñ

yunhi gar lutf tum lete rahoge KHun bahane mein

to bismil hi nazar aaenge har su is zamane mein

zara dam lo to phir tum ko sunain dastan dil ki

abhi kuchh rang bharna hai hamein gham ke fasane mein

lahu se ho gai rangin dekho aastin apni

hazaron koshishen kin tum ne go daman bachane mein

yahi kah kar asiran-e-qafas aansu bahate hain

qafas mein wo kahan rahat mili jo aashiyane mein

kuchh aisa be-KHudi-e-shauq ne behis banaya hai

aziyyat ab nahin mahsus hoti tir khane mein

wo barham honge duniya jaan legi raaz ulfat ka

wafa par harf aa jaega do aansu bahane mein

dawa ka waqt ab baqi nahin hangam-e-ruKHsat hai

sidhaaren chaara-gar ab der kya hai nind aane mein

bala se bijliyan girti hain duniya par giren lekin

maza milta hai un ko dam-ba-dam yun muskurane mein

munasib hai yahi 'rifat' ki baz aao mohabbat se

hai lazim jaan ka KHatra kisi se dil lagane mein