yunhi Thahar Thahar ke main rota chala gaya

yūñhī Thahar Thahar ke maiñ rotā chalā gayā

motī sambhal sambhal ke pirotā chalā gayā

sāñchoñ meñ husn o nuur ke Dhaltā gayā shabāb

sar-tā-qadam shabāb hī hotā chalā gayā

dushman ne merī raah meñ kāñTe bichhā diye

aur maiñ uThā to phuul hī botā chalā gayā

har nafas-e-ārzū jo ba-unvān-e-hosh thā

jaise koī sharāb se dhotā chalā gayā

jhūlā jhulā rahī thī mujhe dil kī aarzū

sab jāgte the aur meñ sotā chalā gayā

ranj o malāl o kaif o nashāt o bahār-e-umr

jo kuchh mujhe milā use khotā chalā gayā

ġham kā ḳhamosh naġhma-e-dil-soz bhī 'nushūr'

ik kaif sā ragoñ meñ samotā chalā gayā

yunhi Thahar Thahar ke main rota chala gaya

moti sambhal sambhal ke pirota chala gaya

sanchon mein husn o nur ke Dhalta gaya shabab

sar-ta-qadam shabab hi hota chala gaya

dushman ne meri rah mein kanTe bichha diye

aur main uTha to phul hi bota chala gaya

har nafas-e-arzu jo ba-unwan-e-hosh tha

jaise koi sharab se dhota chala gaya

jhula jhula rahi thi mujhe dil ki aarzu

sab jagte the aur mein sota chala gaya

ranj o malal o kaif o nashat o bahaar-e-umr

jo kuchh mujhe mila use khota chala gaya

gham ka KHamosh naghma-e-dil-soz bhi 'nushur'

ek kaif sa ragon mein samota chala gaya