zabton ki aur qadron ki rawani dekhna

zābtoñ kī aur qadroñ kī ravānī dekhnā

phir havā meñ chār-sū ik bad-gumānī dekhnā

lamha lamha phailtā hī jā rahā hai chār-sū

shahr meñ jañgal kī ik din be-karānī dekhnā

chāhtā hai vo mujhe ḳhush dekhnā har haal meñ

chhīn legā mujh se merī nauha-ḳhvānī dekhnā

aane vaalī aur abhī rāteñ haiñ tārīk-o-muhīb

aur utreñgī balā.eñ āsmānī dekhnā

dhuup niklegī to bah nikleñge phir se ābshār

barf dohrā.egī phir apnī kahānī dekhnā

apnā ghar ham ne basāyā hai lab-e-dariyā to phir

bām-o-dar tak aa.egā ik roz paanī dekhnā

ā.eñge 'betāb' mausam phir chanāroñ par na.e

lā.eñge rañgoñ kī ik taaza kahānī dekhnā

zabton ki aur qadron ki rawani dekhna

phir hawa mein chaar-su ek bad-gumani dekhna

lamha lamha phailta hi ja raha hai chaar-su

shahr mein jangal ki ek din be-karani dekhna

chahta hai wo mujhe KHush dekhna har haal mein

chhin lega mujh se meri nauha-KHwani dekhna

aane wali aur abhi raaten hain tarik-o-muhib

aur utrengi balaen aasmani dekhna

dhup niklegi to bah niklenge phir se aabshaar

barf dohraegi phir apni kahani dekhna

apna ghar hum ne basaya hai lab-e-dariya to phir

baam-o-dar tak aaega ek roz pani dekhna

aaenge 'betab' mausam phir chanaron par nae

laenge rangon ki ek taza kahani dekhna