zad-e-rah bhi nahin be-raKHt-e-safar jate hain

zād-e-rah bhī nahīñ be-raḳht-e-safar jaate haiñ

saḳht hairat hai ki ye log kidhar jaate haiñ

be-ḳhudī meñ tire dīvāne jidhar jaate haiñ

manzileñ pūchhtī phirtī haiñ kidhar jaate haiñ

vaqt paḌ jaa.e to ham sīna-sipar jaate haiñ

naam hī naam nahīñ kaam bhī kar jaate haiñ

haa.e kis moḌ pe hālāt ne pahuñchāyā hai

aap ham-sā.e se ham saa.e se Dar jaate haiñ

ohde-dāroñ meñ bhī ḳhushbū hai hasīnoñ kī sī

va.ada kar lete haiñ aur saaf mukar jaate haiñ

aap jā sakte nahīñ chāñd-sitāroñ se pare

ham varā-e-had-e-idrāk-e-nazar jaate haiñ

aap ke tanz sar āñkhoñ pe magar yaad rahe

ye vo nashtar haiñ ke siine meñ utar jaate haiñ

jab bhī hotā hai kahīñ tazkira-e-mehr-o-vafā

bhūle-bisre hue kuchh naqsh ubhar jaate haiñ

ilm ke saath salīqa ho to phir kyā kahnā

rañg-e-uslūb' se afkār nikhar jaate haiñ

aap dekheñ ye mirī niiñd se bojhal āñkheñ

ho chukī raat ijāzat ho to ghar jaate haiñ

zulf kholo to ghanī chhāñv maiñ kuchh sustā leñ

do-ghaḌī ke liye saa.e meñ Thahar jaate haiñ

zaḳhm alfāz ke nāsūr huā karte haiñ

baat zaḳhmoñ ki nahīñ zaḳhm to bhar jaate haiñ

ham to vārafta-e-ulfat meñ hamārā kyā hai

aaj ye raat ga.e aap kidhar jaate haiñ

kuchh na kuchh hote haiñ har shahr meñ fan ke pārakh

qadr hotī hai jahāñ ahl-e-hunar jaate haiñ

laakh sanjīda sahī 'tāj' hasīnoñ kī ravish

dil uḌā lene ke andāz kidhar jaate haiñ

zad-e-rah bhi nahin be-raKHt-e-safar jate hain

saKHt hairat hai ki ye log kidhar jate hain

be-KHudi mein tere diwane jidhar jate hain

manzilen puchhti phirti hain kidhar jate hain

waqt paD jae to hum sina-sipar jate hain

nam hi nam nahin kaam bhi kar jate hain

hae kis moD pe haalat ne pahunchaya hai

aap ham-sae se hum sae se Dar jate hain

ohde-daron mein bhi KHushbu hai hasinon ki si

wada kar lete hain aur saf mukar jate hain

aap ja sakte nahin chand-sitaron se pare

hum wara-e-had-e-idrak-e-nazar jate hain

aap ke tanz sar aankhon pe magar yaad rahe

ye wo nashtar hain ke sine mein utar jate hain

jab bhi hota hai kahin tazkira-e-mehr-o-wafa

bhule-bisre hue kuchh naqsh ubhar jate hain

ilm ke sath saliqa ho to phir kya kahna

rang-e-uslub' se afkar nikhar jate hain

aap dekhen ye meri nind se bojhal aankhen

ho chuki raat ijazat ho to ghar jate hain

zulf kholo to ghani chhanw main kuchh susta len

do-ghaDi ke liye sae mein Thahar jate hain

zaKHm alfaz ke nasur hua karte hain

baat zaKHmon ki nahin zaKHm to bhar jate hain

hum to warafta-e-ulfat mein hamara kya hai

aaj ye raat gae aap kidhar jate hain

kuchh na kuchh hote hain har shahr mein fan ke parakh

qadr hoti hai jahan ahl-e-hunar jate hain

lakh sanjida sahi 'taj' hasinon ki rawish

dil uDa lene ke andaz kidhar jate hain