zahid asir-e-gesu-e-jaanan na ho saka

zāhid asīr-e-gesū-e-jānāñ na ho sakā

jo mutma.in huā vo pareshāñ na ho sakā

qaid-e-ḳhudī meñ aadmī insāñ na ho sakā

zarra simaT gayā to bayābāñ na ho sakā

dāman tak aa ke chaak garebāñ bhī rah gayā

andāza-e-bahār-e-gulistāñ na ho sakā

ḳhūn-e-dil-o-jigar na tabassum banā na ashk

mazmūn-e-ārzū koī unvāñ na ho sakā

marnā to ek baar huā sahl bhī magar

jiinā kisī tarah kabhī āsāñ na ho sakā

baḌhtā hī jā rahā hai zamāne kā iztirāb

duniyā ke dard kā koī darmāñ na ho sakā

mustaqbil-e-hayāt ke irfāñ se maiñ 'nushūr'

is daur-e-pur-fareb kā insāñ na ho sakā

zahid asir-e-gesu-e-jaanan na ho saka

jo mutmain hua wo pareshan na ho saka

qaid-e-KHudi mein aadmi insan na ho saka

zarra simaT gaya to bayaban na ho saka

daman tak aa ke chaak gareban bhi rah gaya

andaza-e-bahaar-e-gulistan na ho saka

KHun-e-dil-o-jigar na tabassum bana na ashk

mazmun-e-arzu koi unwan na ho saka

marna to ek bar hua sahl bhi magar

jina kisi tarah kabhi aasan na ho saka

baDhta hi ja raha hai zamane ka iztirab

duniya ke dard ka koi darman na ho saka

mustaqbil-e-hayat ke irfan se main 'nushur'

is daur-e-pur-fareb ka insan na ho saka