zahid ko apne zohd pe kis darja naz hai

zāhid ko apne zohd pe kis darja naaz hai

us ne sunā nahīñ ki ḳhudā be-niyāz hai

tum sham.a-rū ho maiñ to mujassam huuñ ek sham.a

rag rag meñ merī hālat-e-soz-o-gudāz hai

ai chāra-sāz pahle nikāl us ko khīñch kar

ik tiir siine meñ nafas-e-jāñ-gudāz hai

ḳhidmat ko merī aaj bhī hāzir hai āsmāñ

vo is ko kyā kare ki mujhe ehtirāz hai

zāhid mai-e-tahūr bhī āḳhir sharāb hai

mujh ko to manā kartā hai tū kab majāz hai

pahle gunāhgār hī pahuñche bahisht meñ

vo to baḌā karīm baḌā be-niyāz hai

lillāh ai hujūm-e-tamannā zarā Thahar

ye vaqt-e-ruḳhsat-e-nafas-e-jāñ-gudāz hai

roz-e-qayāmat aaj to vaa.iz dharā nahīñ

ik umr chāhiye use muddat darāz hai

ġhurbat meñ mujh se pūchhtī hai merī bekasī

yaañ ai ġharīb kaun tirā chāra-sāz hai

ai ham-rahāñ baḌhā.e hue ab qadam chalo

din muḳhtasar hai aur masāfat darāz hai

sotā banā hai naaz se koī shab-e-visāl

haañ vāqa.ī ye ḳhvāb hai ye ḳhvāb-e-nāz hai

ai dil na kar har ek se tū shikva-e-raqīb

kambaḳht is meñ terā hī ifshā-e-rāz hai

āḳhir masīh ne bhī liyā apnā haath khīñch

parvardigār tū hī bas ab chāra-sāz hai

tum aur tum se mel kare koī pāk-bāz

achchhī kahī ki ġhair baḌā pāk-bāz hai

tarz-e-sitam kuchh aur ab ījād kījiye

tirchhī nazar to ek pasandīda naaz hai

'nādir' nikal gayā hai agar koī sher-e-garm

siine kā soz hai mire dil kā gudāz hai

zahid ko apne zohd pe kis darja naz hai

us ne suna nahin ki KHuda be-niyaz hai

tum shama-ru ho main to mujassam hun ek shama

rag rag mein meri haalat-e-soz-o-gudaz hai

ai chaara-saz pahle nikal us ko khinch kar

ek tir sine mein nafas-e-jaan-gudaz hai

KHidmat ko meri aaj bhi hazir hai aasman

wo is ko kya kare ki mujhe ehtiraaz hai

zahid mai-e-tahur bhi aaKHir sharab hai

mujh ko to mana karta hai tu kab majaz hai

pahle gunahgar hi pahunche bahisht mein

wo to baDa karim baDa be-niyaz hai

lillah ai hujum-e-tamanna zara Thahar

ye waqt-e-ruKHsat-e-nafas-e-jaan-gudaz hai

roz-e-qayamat aaj to waiz dhara nahin

ek umr chahiye use muddat daraaz hai

ghurbat mein mujh se puchhti hai meri bekasi

yan ai gharib kaun tera chaara-saz hai

ai ham-rahan baDhae hue ab qadam chalo

din muKHtasar hai aur masafat daraaz hai

sota bana hai naz se koi shab-e-visal

han waqai ye KHwab hai ye KHwab-e-naz hai

ai dil na kar har ek se tu shikwa-e-raqib

kambaKHt is mein tera hi ifsha-e-raaz hai

aaKHir masih ne bhi liya apna hath khinch

parwardigar tu hi bas ab chaara-saz hai

tum aur tum se mel kare koi pak-baz

achchhi kahi ki ghair baDa pak-baz hai

tarz-e-sitam kuchh aur ab ijad kijiye

tirchhi nazar to ek pasandida naz hai

'nadir' nikal gaya hai agar koi sher-e-garm

sine ka soz hai mere dil ka gudaz hai