zahiran nuqta hun ek simTa hua

zāhiran nuqta huuñ ik simTā huā

ġhaur se dekho to huuñ bikhrā huā

is qadar māyūs huuñ chehroñ se maiñ

apnā chehra bhī lage badlā huā

Dar rahā huuñ ho na jaa.e pāsh-pāsh

aadmī ab kāñch kā putlā huā

zehn meñ kuchh din se hai koī ḳhayāl

ek kāñTe kī tarah chubhtā huā

apne chehre par bharosa ho jise

aa.ine se kyoñ phire chhuptā huā

tīrgī kā ḳhauf ab tak hai muhīt

ye ujālā jaise ho māñgā huā

jaane kyoñ ye sochtā rahtā huuñ maiñ

kal ko ye sūraj agar andhā huā

sochne meñ ajnabī mere liye

dekhne meñ vo lage dekhā huā

ham to ai 'manzūr' tanhā ho ga.e

ḳhuun paanī se bhī kuchh patlā huā

zahiran nuqta hun ek simTa hua

ghaur se dekho to hun bikhra hua

is qadar mayus hun chehron se main

apna chehra bhi lage badla hua

Dar raha hun ho na jae pash-pash

aadmi ab kanch ka putla hua

zehn mein kuchh din se hai koi KHayal

ek kanTe ki tarah chubhta hua

apne chehre par bharosa ho jise

aaine se kyon phire chhupta hua

tirgi ka KHauf ab tak hai muhit

ye ujala jaise ho manga hua

jaane kyon ye sochta rahta hun main

kal ko ye suraj agar andha hua

sochne mein ajnabi mere liye

dekhne mein wo lage dekha hua

hum to ai 'manzur' tanha ho gae

KHun pani se bhi kuchh patla hua