zalim ko bhi phir nashsha-e-bedad-gari hai

zālim ko bhī phir nashsha-e-bedād-garī hai

phir ham haiñ vahī phir vahī āshufta-sarī hai

vo aa.e hai jab yaad to lagtā hai kuchh aisā

jaise koī chaTTān sī siine pe dharī hai

zāhid ne use dekhā jo Tuk dekh ke bolā

aadam kī hī beTī hai ki ye huur parī hai

mahfil meñ mujhe aap kahā us gul-e-tar ne

ab aap hai kis zumre kā ye dard-e-sarī hai

kyā haal huā ḳhvāhish-e-yak-dīd meñ merā

āñkhoñ meñ koī ashk bhī baaqī na tarī hai

ye satr likhī āḳhirī aur band kiiñ āñkheñ

kyā ḳhuub tirī chāragarī chāragarī hai

is tarh se miltā hai agar 'ohda-o-mansab

kyā vaq'at-e-imlāk hai kyā tāj-varī hai

zalim ko bhi phir nashsha-e-bedad-gari hai

phir hum hain wahi phir wahi aashufta-sari hai

wo aae hai jab yaad to lagta hai kuchh aisa

jaise koi chaTTan si sine pe dhari hai

zahid ne use dekha jo Tuk dekh ke bola

aadam ki hi beTi hai ki ye hur pari hai

mahfil mein mujhe aap kaha us gul-e-tar ne

ab aap hai kis zumre ka ye dard-e-sari hai

kya haal hua KHwahish-e-yak-did mein mera

aankhon mein koi ashk bhi baqi na tari hai

ye satr likhi aaKHiri aur band kin aankhen

kya KHub teri chaaragari chaaragari hai

is tarh se milta hai agar 'ohda-o-mansab

kya waq'at-e-imlak hai kya taj-wari hai