zanun pe tere ghair ka sar dekh rahe hain

zānūñ pe tire ġhair kā sar dekh rahe haiñ

fitna tirā o fitna-nazar dekh rahe haiñ

jis samt uThī aañkh udhar dekh rahe haiñ

maujūd tū hī tū hai jidhar dekh rahe haiñ

har samt tire rū-e-munavvar kī tajallī

o parda-nashīñ parda na kar dekh rahe haiñ

jab sub.h huī ham haiñ kahāñ aur kahāñ tum

ik ye bhī qayāmat kā asar dekh rahe haiñ

aa baiThegā uḌ kar mire siine pe kisī din

nikle haiñ tire tiir ko par dekh rahe haiñ

jhuñjhlā ke kahā mujh se ki uThte bhī ḳhudārā

shab jā chukī hotī hai sahar dekh rahe haiñ

duniyā meñ koī bhī nahīñ ik haal pe rahtā

lākhoñ ke ujaḌte hue ghar dekh rahe haiñ

kyoñ vaqt-e-musībat meñ tū ghabrā gayā 'sanjar'

ab dekh vo rahmat kī nazar dekh rahe haiñ

zanun pe tere ghair ka sar dekh rahe hain

fitna tera o fitna-nazar dekh rahe hain

jis samt uThi aankh udhar dekh rahe hain

maujud tu hi tu hai jidhar dekh rahe hain

har samt tere ru-e-munawwar ki tajalli

o parda-nashin parda na kar dekh rahe hain

jab subh hui hum hain kahan aur kahan tum

ek ye bhi qayamat ka asar dekh rahe hain

aa baiThega uD kar mere sine pe kisi din

nikle hain tere tir ko par dekh rahe hain

jhunjhla ke kaha mujh se ki uThte bhi KHudara

shab ja chuki hoti hai sahar dekh rahe hain

duniya mein koi bhi nahin ek haal pe rahta

lakhon ke ujaDte hue ghar dekh rahe hain

kyon waqt-e-musibat mein tu ghabra gaya 'sanjar'

ab dekh wo rahmat ki nazar dekh rahe hain