zat ke gard fasilen hain riyazat malum

zaat ke gard fasīleñ haiñ riyāzat ma.alūm

sirf jannat ke liye hai to ibādat ma.alūm

ye bhī ik shān-e-rahīmī hai tirī izz-o-jal

na to manzil kī ḳhabar hai na masāfat ma.alūm

vo bhī ik shaḳhs hai saada sā magar pechīda

na khulī us kī mohabbat na adāvat ma.alūm

zaḳhm-e-dil ho ga.e ḳhandāñ vo mulāqāt huī

hai mujhe aap kā andāz-e-ayādat ma.alūm

vahī qātil vahī munsif vahī ainī shāhid

adl aur aap kī mīzān-e-adālat ma.alūm

jāñch kā hukm haqā.eq kī hai parda-poshī

un ko pahle se haiñ asbāb-e-baġhāvat ma.alūm

aise-vaise hue is shahr meñ kaise kaise

ahl-e-dastār kī hai ham ko najābat ma.alūm

ḳhūn-e-nāhaq se haiñ buniyādeñ bharī mahloñ kī

qatl hote the jo hotī thī siyādat ma.alūm

zat ke gard fasilen hain riyazat malum

sirf jannat ke liye hai to ibaadat malum

ye bhi ek shan-e-rahimi hai teri izz-o-jal

na to manzil ki KHabar hai na masafat malum

wo bhi ek shaKHs hai sada sa magar pechida

na khuli us ki mohabbat na adawat malum

zaKHm-e-dil ho gae KHandan wo mulaqat hui

hai mujhe aap ka andaz-e-ayaadat malum

wahi qatil wahi munsif wahi aini shahid

adl aur aap ki mizan-e-adalat malum

jaanch ka hukm haqaeq ki hai parda-poshi

un ko pahle se hain asbab-e-baghawat malum

aise-waise hue is shahr mein kaise kaise

ahl-e-dastar ki hai hum ko najabat malum

KHun-e-nahaq se hain buniyaaden bhari mahlon ki

qatl hote the jo hoti thi siyaadat malum