zati muamlat se bahar ka kuchh kaho

zaatī muāmlāt se bāhar kā kuchh kaho

tum kātib-e-hayāt se bāhar kā kuchh kaho

bezār ho ga.ī huuñ purāne ḳhitāb se

is baar kā.enāt se bāhar kā kuchh kaho

taftīsh ho rahī hai mire fan pe in dinoñ

tum log merī zaat se bāhar kā kuchh kaho

rahne do apnī pahlī mohabbat kā tazkira

yā'nī ki pul-sirāt se bāhar kā kuchh kaho

ḳhush-fahmiyoñ kī jaal se niklo zarā sī der

ab husn-e-shā’erāt se bāhar kā kuchh kaho

daur-e-jadīdiyat meñ purānā ye falsafa

aisā hai to luġhāt se bāhar kā kuchh kaho

tum bolne ke fan meñ to māhir ho 'shāziya'

lekin zarā sifāt se bāhar kā kuchh kaho

zati muamlat se bahar ka kuchh kaho

tum katib-e-hayat se bahar ka kuchh kaho

bezar ho gai hun purane KHitab se

is bar kaenat se bahar ka kuchh kaho

taftish ho rahi hai mere fan pe in dinon

tum log meri zat se bahar ka kuchh kaho

rahne do apni pahli mohabbat ka tazkira

ya'ni ki pul-siraat se bahar ka kuchh kaho

KHush-fahmiyon ki jal se niklo zara si der

ab husn-e-sha’eraat se bahar ka kuchh kaho

daur-e-jadidiyat mein purana ye falsafa

aisa hai to lughat se bahar ka kuchh kaho

tum bolne ke fan mein to mahir ho 'shaziya'

lekin zara sifat se bahar ka kuchh kaho