zaban-e-KHalq ko chup aastin ko tar pa kar

zabān-e-ḳhalq ko chup āstīñ ko tar pā kar

maiñ āb-dīda havā ḳhuuñ ko dar-ba-dar pā kar

ye kis ke qurb kī ḳhushbū basī hai sāñsoñ meñ

ye mujh se kaun milā mujh ko be-ḳhabar pā kar

safar kī shart kabhī is qadar kaḌī kab thī

thakan kuchh aur baḌhī sāya-e-shajar pā kar

vo sabz-tan thā shafaq pairahan khulā us par

banā gulāb sā vo lams yak nazar pā kar

vo nā-shanās-e-tabī.at hai jāntā thā maiñ

vo hairatoñ meñ rahā teġh ko sipar pā kar

abhī abhī maiñ jise dafn kar ke lauTā huuñ

bahut ajiib lagā us ko apne ghar pā kar

zaban-e-KHalq ko chup aastin ko tar pa kar

main aab-dida hawa KHun ko dar-ba-dar pa kar

ye kis ke qurb ki KHushbu basi hai sanson mein

ye mujh se kaun mila mujh ko be-KHabar pa kar

safar ki shart kabhi is qadar kaDi kab thi

thakan kuchh aur baDhi saya-e-shajar pa kar

wo sabz-tan tha shafaq pairahan khula us par

bana gulab sa wo lams yak nazar pa kar

wo na-shanas-e-tabiat hai jaanta tha main

wo hairaton mein raha tegh ko sipar pa kar

abhi abhi main jise dafn kar ke lauTa hun

bahut ajib laga us ko apne ghar pa kar