zaban-e-nutq mein paida agar husn-e-bayan kar lun

zabān-e-nutq meñ paidā agar husn-e-bayāñ kar luuñ

chaman ke zarra-zarra ko maiñ apnā ham-zabāñ kar luuñ

bahut mumkin hai paidā ishq meñ dushvāriyāñ kar luuñ

magar dil ko kisī sūrat shanāsā-e-fuġhāñ kar luuñ

nigāh-e-iltifāt us kī agar vus.at-badāmāñ ho

zamāne bhar ke armānoñ ko dil meñ mehmāñ kar luuñ

maiñ vo īzā-talab huuñ bar-sar-e-manzil bhaTak jā.ūñ

rah-e-āsāñ meñ paidā jaan kar dushvāriyāñ kar luuñ

asīr-e-nau huuñ maiñ vāqif nahīñ ādāb-e-zindāñ se

ki kab naala karūñ aur band kab apnī zabāñ kar luuñ

maze soz-e-mohabbat ke koī dil se mire pūchhe

jo qaabū ho to saarī hasratoñ ko bijliyāñ kar luuñ

dikhā dūñgā kahāñ jhukte haiñ sar saarī ḳhudā.ī ke

magar pahle maiñ tere āstāñ ko āstāñ kar luuñ

maiñ ḳhud vāqif nahīñ ab tak 'munīr' is rāz-e-ulfat se

chhupā.ūñ rāz-e-dil kis se maiñ kis ko rāzdāñ kar luuñ

zaban-e-nutq mein paida agar husn-e-bayan kar lun

chaman ke zarra-zarra ko main apna ham-zaban kar lun

bahut mumkin hai paida ishq mein dushwariyan kar lun

magar dil ko kisi surat shanasa-e-fughan kar lun

nigah-e-iltifat us ki agar wusat-badaman ho

zamane bhar ke armanon ko dil mein mehman kar lun

main wo iza-talab hun bar-sar-e-manzil bhaTak jaun

rah-e-asan mein paida jaan kar dushwariyan kar lun

asir-e-nau hun main waqif nahin aadab-e-zindan se

ki kab nala karun aur band kab apni zaban kar lun

maze soz-e-mohabbat ke koi dil se mere puchhe

jo qabu ho to sari hasraton ko bijliyan kar lun

dikha dunga kahan jhukte hain sar sari KHudai ke

magar pahle main tere aastan ko aastan kar lun

main KHud waqif nahin ab tak 'munir' is raaz-e-ulfat se

chhupaun raaz-e-dil kis se main kis ko raazdan kar lun