zaban ka qarz utarne nahin diya maine

zabāñ kā qarz utarne nahīñ diyā maiñ ne

har ek zaḳhm ko nāsūr kar liyā maiñ ne

ye soch kar ki koī āsmān manzil hai

junūñ meñ apnā nasheman jalā diyā maiñ ne

vo jis kī shakl bhī āñkhoñ ko nāgavār huī

usī ke tanz ko dil meñ basā liyā maiñ ne

hasad kī ek tavā.if suhā.ī āñkhoñ ko

vafā se is liye dāman chhuḌā liyā maiñ ne

badan ke peḌ the āñkhoñ kī kashtiyāñ thiiñ jahāñ

vahāñ pe ek bhī lamha nahīñ jiyā maiñ ne

kahīñ diloñ meñ añdhere the rāstoñ meñ kahīñ

safar tamām siyāhī meñ tai kiyā maiñ ne

zaban ka qarz utarne nahin diya main ne

har ek zaKHm ko nasur kar liya main ne

ye soch kar ki koi aasman manzil hai

junun mein apna nasheman jala diya main ne

wo jis ki shakl bhi aankhon ko nagawar hui

usi ke tanz ko dil mein basa liya main ne

hasad ki ek tawaif suhai aankhon ko

wafa se is liye daman chhuDa liya main ne

badan ke peD the aankhon ki kashtiyan thin jahan

wahan pe ek bhi lamha nahin jiya main ne

kahin dilon mein andhere the raston mein kahin

safar tamam siyahi mein tai kiya main ne