zaban ko zaiqa-e-sher-e-tar nahin milta

zabāñ ko zā.iqa-e-sher-e-tar nahīñ miltā

baḌhā hai zor zabāñ meñ asar nahīñ miltā

ḳhud apne haal kī koī ḳhabar nahīñ miltī

koī bhī jazba-e-dil-e-mo.atabar nahīñ miltā

sabhī haiñ khoī huī manziloñ kī gard meñ gum

safar bahut hai ma.āl-e-safar nahīñ miltā

jo dasht meñ the vo begāna-e-ḳhalā.iq the

jo shahr meñ the unheñ apnā ghar nahīñ miltā

ajiib taur haiñ ab kār-gāh duniyā ke

ġhurūr-e-ishq javāz-e-hunar nahīñ miltā

bayān-e-shauq-e-safar ahl-e-dard kā hai bahut

magar nishān sar-e-rahguzar nahīñ miltā

farāġh-e-dil nahīñ ab kū-e-gul-e-ruḳhāñ meñ kahīñ

ki zaḳhm koī yahāñ kārgar nahīñ miltā

dayār-e-shauq meñ yā kūcha-e-malāmat meñ

kahīñ bhī 'bāqar'-e-āshufta-sar nahīñ miltā

zaban ko zaiqa-e-sher-e-tar nahin milta

baDha hai zor zaban mein asar nahin milta

KHud apne haal ki koi KHabar nahin milti

koi bhi jazba-e-dil-e-moatabar nahin milta

sabhi hain khoi hui manzilon ki gard mein gum

safar bahut hai maal-e-safar nahin milta

jo dasht mein the wo begana-e-KHalaiq the

jo shahr mein the unhen apna ghar nahin milta

ajib taur hain ab kar-gah duniya ke

ghurur-e-ishq jawaz-e-hunar nahin milta

bayan-e-shauq-e-safar ahl-e-dard ka hai bahut

magar nishan sar-e-rahguzar nahin milta

faragh-e-dil nahin ab ku-e-gul-e-ruKHan mein kahin

ki zaKHm koi yahan kargar nahin milta

dayar-e-shauq mein ya kucha-e-malamat mein

kahin bhi 'baqar'-e-ashufta-sar nahin milta