zaban mile to hazar baaten kaha karen hum

zabāñ mile to hazār bāteñ kahā kareñ ham

sadā kā rishta hī TuuT jaa.e to kyā kareñ ham

ye shahr-e-shīsha to shahr-e-nā-āshnā hai pyāre

kise pukāreñ yahāñ kise āshnā kareñ ham

agar ḳhudā tak pahuñch sake harf-e-nā-rasā.ī

to arsh tak bhī buland dast-e-duā kareñ ham

yahāñ masīhā ke kaam hī jab duā na aa.ī

duā kareñ ab to kis kī ḳhātir duā kareñ ham

ab un ke hāthoñ kafan kā ehsāñ bhī kyoñ uThā.eñ

shahādatoñ ke lahū se rangīñ qabā kareñ ham

koī kisī ko na de sake tān-e-nā-rasā.ī

jo qarz-e-jāñ hai vo mar ke va.ada vafā kareñ ham

ham apnā qātil ḳhud apne hī aa.ine meñ dekheñ

agar kabhī apnī zaat kā sāmnā kareñ ham

mahak uThe karbalā se apne vatan tak aa.e

kuchh aise zinda vo qissa-e-karbalā kareñ ham

vo jis kī ḳhushbū abad abad tak rahe salāmat

ik aisā naama raqam safīr-e-sabā kareñ ham

vo jis adā se urūs-e-fardā ko tū ne chūmā

nisār us par har ik adā ḳhush-adā kareñ ham

'jamīl' sab se azīm-tar is sadī kā ġham hai

sabhī ko ab is ke ishq meñ mubtalā kareñ ham

zaban mile to hazar baaten kaha karen hum

sada ka rishta hi TuT jae to kya karen hum

ye shahr-e-shisha to shahr-e-na-ashna hai pyare

kise pukaren yahan kise aashna karen hum

agar KHuda tak pahunch sake harf-e-na-rasai

to arsh tak bhi buland dast-e-dua karen hum

yahan masiha ke kaam hi jab dua na aai

dua karen ab to kis ki KHatir dua karen hum

ab un ke hathon kafan ka ehsan bhi kyon uThaen

shahadaton ke lahu se rangin qaba karen hum

koi kisi ko na de sake tan-e-na-rasai

jo qarz-e-jaan hai wo mar ke wada wafa karen hum

hum apna qatil KHud apne hi aaine mein dekhen

agar kabhi apni zat ka samna karen hum

mahak uThe karbala se apne watan tak aae

kuchh aise zinda wo qissa-e-karbala karen hum

wo jis ki KHushbu abad abad tak rahe salamat

ek aisa nama raqam safir-e-saba karen hum

wo jis ada se urus-e-farda ko tu ne chuma

nisar us par har ek ada KHush-ada karen hum

'jamil' sab se azim-tar is sadi ka gham hai

sabhi ko ab is ke ishq mein mubtala karen hum