zaban par sabhi ki baat hai faqat sawar ki

zabān par sabhī kī baat hai faqat savār kī

kabhī to baat bhī ho pālkī liye kahār kī

guloñ ko titliyoñ ko kis tarah karegā yaad vo

ki jis ko fikr rāt-din lagī ho rozgār kī

bigaḌ ke jis ne pā liyā tamām lutf-e-zindagī

nahīñ sunegā phir vo baat koī bhī sudhār kī

vo ḳhush rahe ye soch kar sadā maiñ hārtā gayā

kisī ke saath jab laḌī laḌā.ī ār-pār kī

jise bhī dekhiye use vo toḌ kar hī hai baḌhā

kahāñ rahīñ haiñ desh meñ zarūrateñ qatār kī

tujhe paḌhā hamesha maiñ ne apnī band āñkhoñ se

ye dāstān hai nazar pe raushnī ke vaar kī

chaḌhe jo is qadar ki phir kabhī utar nahīñ sake

talāsh zindagī meñ hai mujhe usī ḳhumār kī

zaban par sabhi ki baat hai faqat sawar ki

kabhi to baat bhi ho palki liye kahaar ki

gulon ko titliyon ko kis tarah karega yaad wo

ki jis ko fikr raat-din lagi ho rozgar ki

bigaD ke jis ne pa liya tamam lutf-e-zindagi

nahin sunega phir wo baat koi bhi sudhaar ki

wo KHush rahe ye soch kar sada main haarta gaya

kisi ke sath jab laDi laDai aar-par ki

jise bhi dekhiye use wo toD kar hi hai baDha

kahan rahin hain desh mein zaruraten qatar ki

tujhe paDha hamesha main ne apni band aankhon se

ye dastan hai nazar pe raushni ke war ki

chaDhe jo is qadar ki phir kabhi utar nahin sake

talash zindagi mein hai mujhe usi KHumar ki