zaban par shikwa-e-paiham nahin hai

zabāñ par shikva-e-paiham nahīñ hai

sar-e-taslīm apnā ḳham nahīñ hai

ye har mausam meñ phaltī phūltī hai

mohabbat kā koī mausam nahīñ hai

manā.eñ ḳhair apnī jaan kī sab

ki mahfil meñ vo atom-bam nahīñ hai

zamīñ par haiñ sabhī aadam ke beTe

yahāñ koī kisī se kam nahīñ hai

zamīñ par bhaag kar jaa.eñ kahāñ ham

kahāñ batlāo atom-bam nahīñ hai

hai ghar meñ radio aur television

hameñ kyā ġham ki jām-e-jam nahīñ hai

ḳhudā ko hai talāsh-e-qaum-e-dīgar

musalmānoñ meñ vo dam-ḳham nahīñ hai

masīhā ko bulā kar kyā kareñge

hamāre zaḳhm kā marham nahīñ hai

sunāyā qissa-e-ġham tū ne 'maz.har'

kisī kī aañkh lekin nam nahīñ hai

zaban par shikwa-e-paiham nahin hai

sar-e-taslim apna KHam nahin hai

ye har mausam mein phalti phulti hai

mohabbat ka koi mausam nahin hai

manaen KHair apni jaan ki sab

ki mahfil mein wo atom-bam nahin hai

zamin par hain sabhi aadam ke beTe

yahan koi kisi se kam nahin hai

zamin par bhag kar jaen kahan hum

kahan batlao atom-bam nahin hai

hai ghar mein radio aur telewision

hamein kya gham ki jam-e-jam nahin hai

KHuda ko hai talash-e-qaum-e-digar

musalmanon mein wo dam-KHam nahin hai

masiha ko bula kar kya karenge

hamare zaKHm ka marham nahin hai

sunaya qissa-e-gham tu ne 'mazhar'

kisi ki aankh lekin nam nahin hai