zaban rakhte hain maina ki magar tote ka qissa hai

zabāñ rakhte haiñ mainā kī magar tote kā qissa hai

zarā sī baat meñ āñkheñ badal lene kā qissa hai

sunā hai lāThiyoñ se phaT gayā dariyā kā paanī bhī

hamāre ḳhūb-sūrat ghar ke baTvāre kā qissa hai

bikā hai kauḌiyoñ ke mol majbūrī meñ hiirā bhī

abhī pichhle baras baisākh ke mele kā qissa hai

ġharībī ke buḌhāpe se ḳhudā mahfūz hī rakkhe

kisī beTī kī bāteñ haiñ kisī beTe kā qissa hai

khule chehroñ ke saa.e meñ guzāro bhī koī lamha

vahī be-chehragī kā ġham vahī chehre kā qissa hai

vo patthar khāte jaate the du'ā.eñ dete jaate the

magar bhaa.ī ye chaudah sau baras pahle kā qissa hai

mirī nukta-rasī bhī mere yāroñ ko khaTaktī hai

ki mere she'r kī garmī se jal jaane kā qissa hai

vo jis ke dam se zinda haiñ hamāre shahr ke fitne

zabānoñ par usī mā'sūm ke bachche kā qissa hai

ḳhayāl aa.e bhī kaise ai 'ra.īs' us kī 'ibādat kā

yahāñ mandir ke jhagḌe haiñ vahāñ kā'be kā qissa hai

zaban rakhte hain maina ki magar tote ka qissa hai

zara si baat mein aankhen badal lene ka qissa hai

suna hai laThiyon se phaT gaya dariya ka pani bhi

hamare KHub-surat ghar ke baTware ka qissa hai

bika hai kauDiyon ke mol majburi mein hira bhi

abhi pichhle baras baisakh ke mele ka qissa hai

gharibi ke buDhape se KHuda mahfuz hi rakkhe

kisi beTi ki baaten hain kisi beTe ka qissa hai

khule chehron ke sae mein guzaro bhi koi lamha

wahi be-chehragi ka gham wahi chehre ka qissa hai

wo patthar khate jate the du'aen dete jate the

magar bhai ye chaudah sau baras pahle ka qissa hai

meri nukta-rasi bhi mere yaron ko khaTakti hai

ki mere she'r ki garmi se jal jaane ka qissa hai

wo jis ke dam se zinda hain hamare shahr ke fitne

zabanon par usi ma'sum ke bachche ka qissa hai

KHayal aae bhi kaise ai 'rais' us ki 'ibaadat ka

yahan mandir ke jhagDe hain wahan ka'be ka qissa hai