zaban se kar ke izhaar-e-haqiqat aafrin maine

zabāñ se kar ke iz.hār-e-haqīqat āfrīñ maiñ ne

zamāne bhar ko apnā kar liyā hai nukta-chīñ maiñ ne

junūñ hai be-ḳhudī hai bekalī hai be-qarārī hai

mohabbat kī hai yā pī lī sharāb-e-ātishīñ maiñ ne

ye aalam kaun sā aalam hai duurī yā huzūrī hai

usī ko rū-ba-rū paayā jab āñkheñ band kiiñ maiñ ne

dam-e-nazzāra dekhe koī nazroñ kā mirī aalam

use yuuñ dekhtā huuñ jaise dekhā hī nahīñ maiñ ne

are o sāmne aa kar nigāheñ pherne vaale

tirī ḳhātir zamāne se nigāheñ pher liiñ maiñ ne

guzar kar be-niyāzāna ġhurūr-e-husn ko āḳhir

rumūz-e-be-niyāzī se kiyā zer-e-nagīñ maiñ ne

ḳhudā mahfūz rakkhe dostoñ se bhī ki dekhe haiñ

libās-e-dostī meñ kitne mār-e-āstīñ maiñ ne

mohabbat zindagī hai 'bazm' lekin log kahte haiñ

ki jām-e-zahr ko samjhā hai jām-e-angabīñ maiñ ne

zaban se kar ke izhaar-e-haqiqat aafrin main ne

zamane bhar ko apna kar liya hai nukta-chin main ne

junun hai be-KHudi hai bekali hai be-qarari hai

mohabbat ki hai ya pi li sharab-e-atishin main ne

ye aalam kaun sa aalam hai duri ya huzuri hai

usi ko ru-ba-ru paya jab aankhen band kin main ne

dam-e-nazzara dekhe koi nazron ka meri aalam

use yun dekhta hun jaise dekha hi nahin main ne

are o samne aa kar nigahen pherne wale

teri KHatir zamane se nigahen pher lin main ne

guzar kar be-niyazana ghurur-e-husn ko aaKHir

rumuz-e-be-niyazi se kiya zer-e-nagin main ne

KHuda mahfuz rakkhe doston se bhi ki dekhe hain

libas-e-dosti mein kitne mar-e-astin main ne

mohabbat zindagi hai 'bazm' lekin log kahte hain

ki jam-e-zahr ko samjha hai jam-e-angabin main ne