zaban se kuchh na kaha an-kahi ne sath diya

zabāñ se kuchh na kahā an-kahī ne saath diyā

kalī se milte hue bekalī ne saath diyā

ye baat sunte hī aañsū nikal paḌe the mire

mileñge phir se agar zindagī ne saath diyā

udaas shaam akele maiñ jheltā kaise

tumhārī yaad thī aur bāñsurī ne saath diyā

guzarnā jaan se āsān to nahīñ thā magar

bhalā ho yaar jo is be-dilī ne saath diyā

safar to ḳhair safar thā guzar hī jaanā thā

jo tum na aa.e to ik ajnabī ne saath diyā

vo mujh ko chhoḌ ke jaatā to mar na jaatā maiñ

chalā gayā hai magar phir usī ne saath diyā

tumheñ ye kis ne kahā hai diyā diye se jale

maiñ jal rahā thā to merā kisī ne saath diyā

maiñ nasl-e-tīrgī ke vaar sah rahā thā bahut

phir ik charāġh janī raushnī ne saath diyā

zaban se kuchh na kaha an-kahi ne sath diya

kali se milte hue bekali ne sath diya

ye baat sunte hi aansu nikal paDe the mere

milenge phir se agar zindagi ne sath diya

udas sham akele main jhelta kaise

tumhaari yaad thi aur bansuri ne sath diya

guzarna jaan se aasan to nahin tha magar

bhala ho yar jo is be-dili ne sath diya

safar to KHair safar tha guzar hi jaana tha

jo tum na aae to ek ajnabi ne sath diya

wo mujh ko chhoD ke jata to mar na jata main

chala gaya hai magar phir usi ne sath diya

tumhein ye kis ne kaha hai diya diye se jale

main jal raha tha to mera kisi ne sath diya

main nasl-e-tirgi ke war sah raha tha bahut

phir ek charagh jani raushni ne sath diya