zaban se meri nam un ka nikal jata to kya hota

zabāñ se merī naam un kā nikal jaatā to kyā hotā

guloñ kā dil ḳhizāoñ se bahal jaatā to kyā hotā

mirā dil sochtā rahtā hai tanhā.ī meñ ye aksar

ki ye sāñsoñ kī garmī se pighal jaatā to kyā hotā

kaḌaktī bijliyoñ kā ek din ehsān lenā thā

nasheman barq se pahle hī jal jaatā to kyā hotā

vo mahtābī ujāloñ ko liye phirte haiñ saath apne

añdherī raat meñ sūraj nikal jaatā to kyā hotā

mire ḳhūn-e-jigar se tū ne sāġhar bhar diye saaqī

agar us aag se māhaul jal jaatā to kyā hotā

hazāroñ zaḳhm hañste hañste tere sah liye maiñ ne

tirī āġhosh meñ ik zaḳhm pal jaatā to kyā hotā

bahār aane ko hai patjhaḌ kā mausam duur hai yaaro

ḳhudā kā ḳhauf bhī dil se nikal jaatā to kyā hotā

haram meñ dekh kar ḳhush haiñ 'shafaq' ahbāb sab mere

agar dahlīz par hī dam nikal jaatā to kyā hotā

zaban se meri nam un ka nikal jata to kya hota

gulon ka dil KHizaon se bahal jata to kya hota

mera dil sochta rahta hai tanhai mein ye aksar

ki ye sanson ki garmi se pighal jata to kya hota

kaDakti bijliyon ka ek din ehsan lena tha

nasheman barq se pahle hi jal jata to kya hota

wo mahtabi ujalon ko liye phirte hain sath apne

andheri raat mein suraj nikal jata to kya hota

mere KHun-e-jigar se tu ne saghar bhar diye saqi

agar us aag se mahaul jal jata to kya hota

hazaron zaKHm hanste hanste tere sah liye main ne

teri aaghosh mein ek zaKHm pal jata to kya hota

bahaar aane ko hai patjhaD ka mausam dur hai yaro

KHuda ka KHauf bhi dil se nikal jata to kya hota

haram mein dekh kar KHush hain 'shafaq' ahbab sab mere

agar dahliz par hi dam nikal jata to kya hota