zabanen chup rahen lekin mizaj-e-yar bolega

zabāneñ chup raheñ lekin mizāj-e-yār bolegā

ki tū bā-zarf hai kitnā tirā kirdār bolegā

na.ī nasloñ ko kis ne kyā diyā hai dekhiye lekin

mire ash.ār meñ tahzīb kā me.aar bolegā

vo jis ne khaa.e haiñ dhoke mohabbat kar ke apnoñ se

vahī to ḳhuun ko paanī guloñ ko ḳhaar bolegā

jahāñ sach baat kahne kā ho matlab jaan se jaanā

usī mahfil meñ bas apnā dil-e-ḳhuddār bolegā

vahāñ a.amāl ko apne koī jhuTlā na pā.egā

ki ye hissa badan kā jab sar-e-darbār bolegā

koī maane na maane par mohabbat hī haqīqat hai

abhī maiñ kah rahā huuñ kal yahī aḳhbār bolegā

agar ḳhāmosh kar bhī dī zabāñ rasm-e-mohabbat meñ

sar-e-mahfil magar 'shāyān' kā kirdār bolegā

zabanen chup rahen lekin mizaj-e-yar bolega

ki tu ba-zarf hai kitna tera kirdar bolega

nai naslon ko kis ne kya diya hai dekhiye lekin

mere ashaar mein tahzib ka mear bolega

wo jis ne khae hain dhoke mohabbat kar ke apnon se

wahi to KHun ko pani gulon ko KHar bolega

jahan sach baat kahne ka ho matlab jaan se jaana

usi mahfil mein bas apna dil-e-KHuddar bolega

wahan aamal ko apne koi jhuTla na paega

ki ye hissa badan ka jab sar-e-darbar bolega

koi mane na mane par mohabbat hi haqiqat hai

abhi main kah raha hun kal yahi aKHbar bolega

agar KHamosh kar bhi di zaban rasm-e-mohabbat mein

sar-e-mahfil magar 'shayan' ka kirdar bolega