zabt-e-alam ne dard ko darman bana diya

zabt-e-alam ne dard ko darmāñ banā diyā

mushkil thī zindagī magar āsāñ banā diyā

siine ko manzil-e-ġham-e-jānāñ banā diyā

yuuñ maut ko hayāt kā sāmāñ banā diyā

duniyā-e-ishq shoḳhī-e-fitrat kī daad de

har ik nigāh-e-husn ko paikāñ banā diyā

ai josh-e-girya-e-ġham-e-jānāñ tire nisār

aañsū ke ek qatre ko tūfāñ banā diyā

ik nūr-baḳhsh mahfil-e-jāñ ke firāq ne

dil ko jalā ke sham-e-shabistāñ banā diyā

qurbān aap kī nigah-e-dil-navāz ke

hairāñ banā diyā mujhe hairāñ banā diyā

rag rag meñ iztirāb-e-mohabbat hai maujzan

ehsās-e-dil ne qatre ko tūfāñ banā diyā

allah re jazb-e-husn kī kaif-āfrīniyāñ

har aa.ine ko shauq meñ hairāñ banā diyā

'kaukab' tumhāre nuur se vo raushnī baḌhī

har zarra-e-ḳhayāl ko tābāñ banā diyā

zabt-e-alam ne dard ko darman bana diya

mushkil thi zindagi magar aasan bana diya

sine ko manzil-e-gham-e-jaanan bana diya

yun maut ko hayat ka saman bana diya

duniya-e-ishq shoKHi-e-fitrat ki dad de

har ek nigah-e-husn ko paikan bana diya

ai josh-e-girya-e-gham-e-jaanan tere nisar

aansu ke ek qatre ko tufan bana diya

ek nur-baKHsh mahfil-e-jaan ke firaq ne

dil ko jala ke sham-e-shabistan bana diya

qurban aap ki nigah-e-dil-nawaz ke

hairan bana diya mujhe hairan bana diya

rag rag mein iztirab-e-mohabbat hai maujzan

ehsas-e-dil ne qatre ko tufan bana diya

allah re jazb-e-husn ki kaif-afriniyan

har aaine ko shauq mein hairan bana diya

'kaukab' tumhaare nur se wo raushni baDhi

har zarra-e-KHayal ko taban bana diya