zabt-e-alam se ishq ka charcha siwa hua

zabt-e-alam se ishq kā charchā sivā huā

āshob-rozgār dil-e-mubtalā huā

thī be-sabātiyoñ meñ haqīqat majāz kī

dil kyoñ fareb-ḳhurda-e-naqsh-e-vafā huā

jab tak alag alag na hoñ ajzā pata kahāñ

maanā ki zarre zarre meñ hai vo chhupā huā

bas ai ḳhayāl-e-tauba ki huuñ tishna-kām-e-aish

rakhā hai mere sāmne sāġhar bharā huā

be-lutf ho na jaa.e kahīñ marg-e-be-kasī

ye kaun ro rahā hai sirhāne khaḌā huā

ham us ko ek jumbish-e-abrū se pā ga.e

vo raaz jo zabān-e-adū se adā huā

ai josh-e-ishq ye tirī jur.at se duur hai

yuuñ jalva-gāh meñ rahe pardā paḌā huā

dil vo jagah nahīñ ki haqīqat chhupī rahe

vahm-o-ḳhayāl ban ke vo aa.e to kyā huā

ujlat huī hai yād-e-suḳhan-hā-e-be-shumār

vo muñh chhupā ke baiTh rahe ye burā huā

nāseh ke dil meñ garmī-e-ulfat kahāñ se ho

hai ik charāġh vo bhī azal kā bujhā huā

ab ham haiñ aur kashmakash-e-mauj-e-iztirāb

kashtī Duboī aur alag nāḳhudā huā

uf ishq-e-fitna-sāz kī jādū-farebiyāñ

dil sā rafīq chashm-zadan meñ judā huā

rakkhī ho dar pe laash zamāna ho sogvār

tum ko qasam hai muñh se na kahnā ye kyā huā

khiñchte haiñ vo ḳhudā na kare parda faash ho

kyā dekhtā hai goshe meñ koī chhupā huā

botal baġhal meñ haath meñ sāġhar liye hue

ye kaun aa rahā hai idhar jhūmtā huā

'nāzish' jafā-e-charḳh kā shikva bajā durust

be-mehrī-e-butāñ kā tumheñ sāmnā huā

zabt-e-alam se ishq ka charcha siwa hua

aashob-rozgar dil-e-mubtala hua

thi be-sabaatiyon mein haqiqat majaz ki

dil kyon fareb-KHurda-e-naqsh-e-wafa hua

jab tak alag alag na hon ajza pata kahan

mana ki zarre zarre mein hai wo chhupa hua

bas ai KHayal-e-tauba ki hun tishna-kaam-e-aish

rakha hai mere samne saghar bhara hua

be-lutf ho na jae kahin marg-e-be-kasi

ye kaun ro raha hai sirhane khaDa hua

hum us ko ek jumbish-e-abru se pa gae

wo raaz jo zaban-e-adu se ada hua

ai josh-e-ishq ye teri jurat se dur hai

yun jalwa-gah mein rahe parda paDa hua

dil wo jagah nahin ki haqiqat chhupi rahe

wahm-o-KHayal ban ke wo aae to kya hua

ujlat hui hai yaad-e-suKHan-ha-e-be-shumar

wo munh chhupa ke baiTh rahe ye bura hua

naseh ke dil mein garmi-e-ulfat kahan se ho

hai ek charagh wo bhi azal ka bujha hua

ab hum hain aur kashmakash-e-mauj-e-iztirab

kashti Duboi aur alag naKHuda hua

uf ishq-e-fitna-saz ki jadu-farebiyan

dil sa rafiq chashm-zadan mein juda hua

rakkhi ho dar pe lash zamana ho sogwar

tum ko qasam hai munh se na kahna ye kya hua

khinchte hain wo KHuda na kare parda fash ho

kya dekhta hai goshe mein koi chhupa hua

botal baghal mein hath mein saghar liye hue

ye kaun aa raha hai idhar jhumta hua

'nazish' jafa-e-charKH ka shikwa baja durust

be-mehri-e-butan ka tumhein samna hua