zabt-e-dil se kaam liya hai

zabt-e-dil se kaam liyā hai

'ishq meñ bhī ārām liyā hai

pal pal sub.h-o-shām liyā hai

ham ne tumhārā naam liyā hai

shukr kī jā hai girte paḌte

terā dāman thaam liyā hai

sub.h huī kuchh aur farozāñ

taḌke kis kā naam liyā hai

terī āñkheñ yaad aa.ī haiñ

jab hāthoñ meñ jaam liyā hai

is kī shāhid gardish-e-daurāñ

maiñ ne kab ārām liyā hai

aur bhī haiñ dil-chor jahāñ meñ

ham ne tumhārā naam liyā hai

kyoñ lī haiñ hāthoñ par zulfeñ

kyoñ hāthoñ meñ daam liyā hai

ḳhālī haath chale duniyā se

ek ḳhayāl-e-ḳhām liyā hai

bande haiñ be-dām tumhāre

ham ne koī daam liyā hai

ruk sī ga.ī hai gardish-e-daurāñ

kis kā dāman thaam liyā hai

us kī har duzdīda nazar se

ham ne ik paiġhām liyā hai

duniyā kis ke kaam aa.ī hai

kis ne is se kaam liyā hai

tum bhī haath meñ thaam lo ḳhanjar

ham ne kaleja thaam liyā hai

haa.e 'amar' ye 'ishq-e-āḳhir

muft kā hī ilzām liyā hai

zabt-e-dil se kaam liya hai

'ishq mein bhi aaram liya hai

pal pal subh-o-sham liya hai

hum ne tumhaara nam liya hai

shukr ki ja hai girte paDte

tera daman tham liya hai

subh hui kuchh aur farozan

taDke kis ka nam liya hai

teri aankhen yaad aai hain

jab hathon mein jam liya hai

is ki shahid gardish-e-dauran

main ne kab aaram liya hai

aur bhi hain dil-chor jahan mein

hum ne tumhaara nam liya hai

kyon li hain hathon par zulfen

kyon hathon mein dam liya hai

KHali hath chale duniya se

ek KHayal-e-KHam liya hai

bande hain be-dam tumhaare

hum ne koi dam liya hai

ruk si gai hai gardish-e-dauran

kis ka daman tham liya hai

us ki har duzdida nazar se

hum ne ek paigham liya hai

duniya kis ke kaam aai hai

kis ne is se kaam liya hai

tum bhi hath mein tham lo KHanjar

hum ne kaleja tham liya hai

hae 'amar' ye 'ishq-e-aKHir

muft ka hi ilzam liya hai